Kangmei leh hremna

Fire & Emergency Services department chuan kângmei laka invenna leh fimkhur chung­changah thuchah an siam a, "Fimkhur loh leh inthlahdah vanga kângmei tichhuaktute hi dan hmanga hrem theih an ni," an ti.

Kangmei chhuak avangin kum tin mai Mizoramah chhiatna a thleng ṭhin a, Fire & Emergency Ser­vices department lam tarlan danin heng kangkei chhuak zinga tam zawk hi chu fimkhur loh vanga thleng a ni. Fimkhur loh vanga kangmei tichhuaktute hi dan anga hrem theih an ni a, kangmei a chhuah tam dan nena chhût chuan hrem tawk erawh an la tam lo hle.

Kangmei a chhuah tawh hi chuan a tikangtu chunga hremna lekkawh mai hi thil harsa tak a ni a, a tuartu zinga an ṭan ve phei chuan hrem pawh a remchang chiah lo. Hetihlai hian ram tikangtu ang chi hi chu hriat chhuah an nih chuan hrem ngei a ṭha hle mai a, fimkhur loh leh inthlahdah vanga ram tikangtute hrem an nih chuan kan fimkhur phah ngeiin a rinawm.

Khaw chhunga kangkei chhuak angah hi chuan thuneitu lam tan pawh hremna lek kawh a harsa deuh mai thei a; nimahsela ram tikangtute erawh chu tun aṭang chuan hrem ni zel tawh se a ṭha hle. Thuneitu lamin na taka an hrem tak tak a nih chuan tun aiin meilam sial kan taima ang a, kan lo halte pawh kan veng uluk zawk ang a, kan ram thing leh mau pawh tam tak kan chhan thei ngei ang.