Lirtheia ri ring chi tihrêm tura ṭan lak

Lunglei police-te chuan lirthei ke hnih nei exhaust pipe (silencer) ring chi an man khawm 41 chu August 28, 2024 khan an tichhia a, roadroller an chîl chhiattir. Lunglei SP chuan, exhaust pipe an mante chu rî rin zawng tehnaa decibel 80 pêlte leh ri ring tura siam danglamte a nih thu leh, dan phal chin aia ring exhaust hmang lirthei an zawn chhunzawm zel dawn thu a sawi.

Khawpui chhunga two wheeler thâwm bengchheng chhuah ṭhinte a rêm theih nan Lunglei police-te'n ṭan an la nasa a; khawlaia tlân chhuakte an man mai bakah, CCTV thlalak hmangin an ûm zui a, in lamahte kal chilhin an man ṭhin. Tunah chuan mikhualin an khalh lut a nih loh chuan a rêm thawkhat tawh nia sawi a ni.

Lunglei police-te inpekna leh thawhrimna a fakawm a, thupek kengkawh tura an hmalakna a ropui; Lunglei mipui nâwlpui pawh an lawm ngeiin a rinawm.

Aizawlah pawh two wheeler-a exhaust pipe ri bengchheng chi vuah khap a ni. Traffic police-te'n hma an la ṭhin a, eng emaw zat an man tawh. Mahse, tun thlengin a la rêm lo a, khawpui chhungah ni tin zan tin hmuh tur tam tak a la awm.

Lirthei kaihhnawihah dan hrang hrang a awm a, tam tak chu lirthei khalhtu leh mi dangte himna tur thilte a ni a, mi dang tana hnawksak a ni lo fo. Exhaust pipe ri ring chi vuah erawh chu lirthei neitu tan a hnawksak lo a, mi dang tana hnawksak em em thung.

Dan bawhchhiatna, sorkarin a khap leh Traffic hotute pawhin khapna thupek an chhuah tawhna - lirtheia exhaust pipe ri bengchheng chi hi hmuh leh hriat harsa lo tak a ni a, chuti chunga tun thlenga tihrêm a la ni lo hi a mak viau mai. Tihrêm tum tak takna a awm loh vang a ni thei ang em?

Aizawla lirtheia exhaust ri ring chi khapna thupek hi mipuia lan mawi tumna leh thiam chan tumna mai ni lo se, khapna thupek khauh taka kenkawh a nih a, Aizawlah a rêm theih nana police/traffic-te'n ṭan an lak lehzual a ngai a ni.