Ruihhlo bawk

Central YMA hnuaia ruihhlo dotu pawl, SRS chuan tun hnai thla li chhunga an ruihhlo mante an hal ral a; heng ruihhlo an man khawm hi Rs 1,03,31,000 man a tling. Kumin March leh June inkarah ruihhlo kaihhnawihah mi 589 an man a ni.

Mizorama ruihhlo a hluar reng mai hi a ngaimawhawm a, ruihhlo ti duh kan awm chhung chu ruihhlo man tur hi chu a awm reng dawn a nih hmel. Kan ṭhalaite'n ruih tur an duh lutuk hi a manganthlak a, hnam dangin an ruih duh ngai loh damdawi leh ruihtheih chi hrang hrang kan han ti duh bik maite hi a pawi ngawt mai.

Chutihlaiin ruihhlo ti turte venna atan te, ruihhlo ti ṭhinte pawhin an sim phah hial theihna turin ruihhlo do beihpui thlak hi a ngai takzet a, tun hmaa CYMA-in ruihhlo an do runpui ang kha thar thawh leh theih ni se a ziaawm ngei ang. Khatih hunlai kha chuan CYMA khan thapui thawhin ruihhlo a do a, hnatlanga thawk chhuakin ke a pen a, ruihhlo tam tak a man a, a hmunpuite tihchhiat a ni a; chutihlaiin tihfuh tawk loh deuhte pawh a lo nei ve thei ang.

Ruihhlo do kawngah hian fimkhur taka kal a ṭul rualin thawm na zawk leh a boruak lian zawka chet a hun leh tawh a nih hmel a, tuna CMYA-a ruihhlo dotute kuta dah ngawt hi chu an hahin an rim em em a, an indaih lo bawk a, tun aia thawm lian zawk chhuah theih ni se a ṭha hle.

Haw hawa nawr erawh thil finthlak ber a ni lo ang a, chutih rualin tuna kan kal ang ringawt hi chuan sorkar lam nghah chu a beidawnthlak ṭan tawh a, khawtlangin theihtawp chhuaha beih hi ruihhlo dona kawngah chuan a sawt hle a ni.