Contractor

Kolasib-a thuthar thehdarhtute chuan Rengtekawn thlanga UD&PA department-in Di Hmun Tlanga Solid Waste Management Centre hna thawh mek an tlawh a, contractor pahnihin lung chhia an hmang tih an hmu chhuak. Cheng vbc. 5 hmangin hna an thawk ṭan a, contractor 17 hnathawk tura thlan an ni a, mi 10 in hna an thawk ṭan mek.

Mizorama kan buaina lian tak pakhat chu contractor tam lutuk leh mi hming hawha contract hna thawk tam lutuk hi a ni. Political party worker tam takte hian an tum ber pakhat chu an party an sorkar huna contract leh supply hna hmuh a ni a, hetiang tak an hmuh theihna tur hian kan ram inrelbawlna pawh hi kalpui mek a ni.

Sorkarna changtu an inthlak rualin contractor thar an piang a, mi thiam bik leh contractor tawnhriat ngah tawh bikin an thawh tur chi hnate chu party mite hnenah sem a ni a, hnain a tuar a, Mizoram tana rotling tur thil tam tak hi a nih tur a ni phak ṭhin lo. Tuna a lan dan chuan kan ram politics kalphung hi kan thlak a nih loh chuan, contractor ṭha neih kan harsat ang a, ṭha taka hnathawktute aiin hmelhriat nei ṭhain hna an hmu thei zawk ang a, heng mite hna hralh chhawn hi a taka contract hna thawktute hian an la inchuh ve leh a, chu chu ramin a tuar ta ṭhin a ni.

Contract hna hi political party mite hian an thawk a nih pawhin an hna tal hi ṭha se, ram tana hnathawk an ni tih inhre ṭhin se a ziaawm tur a ni a; nimahsela contract hna chhe tak tak hmuh tur a awm fo mai hi a pawi hle a ni. Mizorama hnathawh tur awm kan insem dan te, kan inchuh dan leh kan kalphung thlir hian, kan ramin hma a sawn theihna tur chuan kan contract leh supply hna sem dan hi kan thlak hlawk a ngai a, hei hi political party-te'n an ngam loh leh an phal loh tur thil a ni si.

Tu pawhin contract hna hi thawk se, dik leh ṭha takin thawk se, an hlep tur tawk hi chu a hna hian a keng tel sa tawh a, hmanraw chhia hi hmang tel kher tawh suh se.