Vawkte bawk chu!

AH & Vety Minister, C Ngunlianchunga chuan ram dang aṭanga vawk te lak luh tum mek chu pakhat Rs. 98,000 man a nih thu, Assembly House a hrilh. Vawkte hi England aṭangin 50 vel lei tum a nih thu a sawi a, a lo kal man a to a, Delhi leh Mumbai-ah thla khat chhung damdawi ṭhaa enkawl a ngai dawn a, chi thlahtu atana tih a nih avangin a to niin a sawi.

MNF-in sorkar an enkawl lai khan vawkte supply chung­changah hian an mualpho tawh a, tuna Congress-in sorkar an ekawl hnuah pawh vawkte-ah bawk sorkarin sawi a kai leh dawn a ang hle. Vawkte pakhat lakluh man to uchuak hi mipui hriatthiam loh zawng tak a ni a, chi thlahtu a nih leh a kalkawng senso a tam thu sawifiahna hi mipuiin an pawm thiam loh zawng a nih hmel.

Saprama vawk chi ṭha chi lakluh hi nakin zelah Mizoramin a la ṭhatpui mai thei a, vawk ṭhangduang zawk leh hrisel zawkte a nih chuan, a inthlahpun hunah chuan kan la ṭhatpui thei ang. Tuna Mizorama kan vawk vulh tam berte hi tun hmaa Mizote vawk vulh ṭhinte nen kha chuan a inlen hleih tawh hle a, kan bawng vulhte pawh tunah chuan ram dang bawng ang maiin a ṭha ve ta. Hei hian ram dang aṭanga ran chi ṭha lakluh hlawkzia a tilang chiang a; nimahsela tuna vawkte pakhata cheng nuai khat dawn senral hi chu tun dinhmunah chuan mipuiin an man thiam dawn lo niin a lang.

Tun hmain Mizo­ram Assembly House-ah ngei hian vawkte chungchangin sawi a lo hlawh tawh a, tuna vawk manto pawh hi House-a sawi a nih tawh avangin mipuiin an sawi zui leh ngei ang. Minister-in chah luh a nih dante leh a man to chhan a sawifiah a, mipui thinlunga a tlak dan tur erawh a dang deuh mai thei e.