Nuai 100 chuang bo bawhzui thu

Mizoram sorkar hmasaa Assembly Speaker-in April 2023 bâwr vela USA-a a zinnaa Mizo ho kalkhawm hmaah, Deputy Chief Minister-in a enkawl department-ah hnathawhna atan cheng nuai 100 chuang ziah bo a awm thu a sawi a; eng department-ah nge tih erawh a sawi lo. Cheng nuai 100 chuang hmang anga ziah, a taka hmanna hmuh tur awm si lo a awm tihna ang a ni.

Speaker hlui thu sawi hi Mizoram Pradesh Youth Congress Committee chuan bawhzuiin, July 10, 2023 khan Mizoram Lokayukta-ah an zualko a, Speaker-in cheng nuai 100 chuang ziah bo a awm nia a sawi chu chhui turin an ngen. Lokayukta pawhin Anti Corruption Bureau (ACB) nen an bawhzui mek nia sawi a ni.

Sorkar liam taa Assembly Speaker-in Speaker a nih lai ngeia sorkara a lungrualpui–Deputy CM enkawl department-ah eirûkna/ hlemhletna a awm thu a sawi chhuak hi ngaihthah chi a ni lo. A sawi chhuaktu hi sorkara hotu lu berte zinga mi a ni a, sum tam tak ziah bo awmna nia a sawi lah sorkar hotu lu ber pakhat a ni bawk.

Speaker hluiin cheng nuai 100 chuang ziah bo a nih thu a sawi hi chhui zui a, thu dik tak, thil nihna dik tak chhui chhuah ngei ngei tur a ni; ngawihsan mai chi a ni lo. Chhui chhuak turin thuneitute pawhin hlauh nei loin theihtawp an chhuah tur a ni.

Cheng nuai 100 chuang bo nia sawi buaipui mektu Lokayukta hian namnûl chin nei loin, thu dik chhui chhuak ngei turin bawhzui rawh se. Thuneitute tiphûr a, tichak turin mipui náwlpui pawhin an ngaihven zui zel a ṭha ang.

Hetih rual hian, cheng nuai 100 chuang ziah bo a awm anga sawi hi a bo tak tak lo a, Speaker hlui hian thu dik lo a sawi a nih erawh chuan intihhmingchhiatna lian tak a ni ang. Ngawih bopui mai chi a ni lo ang a, a tuartute tan chuan dan anga hmalak chi a ni awm e.