Sawhthing tám beihpui thlâk

Mizorama sorkarna chelh mektute'n sawhthing hralhna man (rate) ṭha tak an tiam avangin kuminah Mizoram hmun hrang hrangah chhungkaw tam takin sawhthing an chíng a, kum dang zawng aiin sawhthing chíng an tam niin a lang. Kut hnathawktute'n sorkar hmalaknaah beiseina sang tak an nei tih a hriat theih.

Kuminah hian Mizoramah chhungkaw 25,102-in sawhthing an chínga chhinchhiah a ni. Vanduaithlak takin chhungkaw 6,500 chuangte sawhthing chu a tám hlauh mai. Beiseina sang tak nena sawhthing chíng, sawhthing tám leh ta si neitute an khawngaihthlak hle.

Horticulture department chuan August 16, 2024 aṭangin sawhthing tám beihpui thlâkna, Operation Ginger 2024 - Fehchhuah Rûnpui an kalpui a; chawlhkar hnih vel an kalpui tawh chhungin August 30 thleng khan Horticulture mithiamte'n khaw 367-a loneitu 5,376 an tlawh chhuak tawh a ni.

Sorkarin sawhthing tám beihpui a thlâk hi a lawmawm a, sawhthing neitu, a bikin sawhthing tám neitute'n an hlâwkpui ngei a beiseiawm.

Horticulture department hian theihtawp chhuah zui zel se, Operation Ginger neih hun chhung tur bithliah an nei a nih pawhin, anmahni-ah kut hnathawktute'n beiseina sang tak an nei a ni tih hriain, an hun bituk tàwp hnuah pawh a theih ang angin beihpui thlâk zui zel se a lawmawm hle ang.

Sawhthing a ni emaw, thlai dang emaw pawh ni se, kut hnathawktute'n mithiam zawkte thurâwn an ngaih pawimawh a, an zawm hrâm hrâm a ṭul. Hei hi an kum khat thawh rah hlawk zawka an seng theihna tura pawimawh a ni.

Tun hma aṭanga tih ṭhin dan (traditional practice) leh tawnhriat hian ṭhatna tam tak a nei ngei ang a, hnualsuat vek theih a ni lo ang. Chutih rualin, kum eng emaw ti chhung mumal taka zira thiamna bik nei mithiamte zirtirna leh kaihhruainate zawm a pawimawh tak zet a ni. Kum lo kal leh zel turah sawhthing a tám tawh loh nan kut hnathawktute'n invên lâwkna lam an ngaih pawimawh a ṭul ang.