Ration card leh mihring zat

Food, Civil Supplies & Consumer Affairs minister John Rotluangliana chuan, Mizoramah family ration card-a hming chuang zat chu mi 15,91,533 an nih thu Assembly House a hrilh. Hetih lai hian, kum 2011 chhiarpuia Mizorama mihring cheng zat chu 10,97,206 a ni a; chhiarpuiah aiin ration card-ah mi 4,94,327-in a tam zawk a ni.

Mizorama thil buaithlak tak chu kan hamṭhatna tur a nih chuan dawt kan sawi hreh lo hi a ni a, ration card chungchangah hian hei hi a lang chiang hle. Tehna dik pawh awm hleithei lo khawpin statistic inang lo a tam a, hei hian hmasawnna kawng zawh turah pawh harsatna a thlen ṭhin a ni.

Tun hnaiah pawh Mizoram sorkar hotu lamin statistic rintlak kan mamawh thu an sawi fo ṭhin a, hei hi ngun zawka ngaihtuah zui a ngai. Statistic rintlak lo kan nei hi a tidik theitu chu sorkar hotu lam tho an ni a, theihtawp chhuahin ṭan la se, kan dinhmun dik tak hi ziakin tilang ṭhin ila, eng emaw dawn hnem beisei vang maia statistic rintlak lo kan nei ṭhin hi a pawi hle a ni.

Ration card-a mihring kan tam dante hi a zahthlak hle mai a, mipui nuai 10 vel awmna state-a ration card dik lohna nuai 4 vel a ni thei hi chu a mualphothlak takzet a ni. Hei hi siam dik tur chuan mimal, khawtlang hruaitu, NGO, sorkar leh koh­hran thlenga ṭanho a ngai a, Mizorama ration card dik lo leh rintlak loh tam lutuk hi siam ṭhat ni ngei rawh se.