Inhremna ni loin insiamṭhatna ni se

State Planning Board vice chairman H Liansailova chuan tun hnai khan Kolasib District Jail a tlawh a, sorkarin jail chhungah thiam thil inzirna chi hrang hrang a buatsaihsak dawn thu a a sawi a, jail tángte chu eizawnna tlaka inzir chhuak turin a fuih.

Mizorama jail tam zawk hi chu inhremna hmun ang ringawt a ni a, Central Jail-te thlengin a hmunhma leh a building a ṭhat tawk loh avangin mi tangte tan inzirna hmun tur a vâng hle ang. Khawvel hmun tam takah chuan jail hi inhremna hmun a nih rualin insiam ṭhatna remchangah an hmang a, thil tam tak zirna hmunah an hmang ṭhin.

Tuna Mizoram hmun hrang hranga jail-te hi a tira an duan lawk danin a zir loh vang pawh a ni ang a, mi tangte tana insiam-ṭhatna hmun a ni thei meuh lo. Tanin chhung hi inzirna ṭha taka hmang tur chuan hmunhma zau leh nuam, inzirna tur ṭha leh zirtirtu ṭha a mamaawh a, chutiang chu kan la hlat hle a ni.

State Planning Board vice chairman sawi ang hian sorkar hian jail tangte inzirna tur hi a tam thei ang ber buatsaih se; misual hremna hmuna kan ngaih hi an inzirna leh an insiamṭhatna hmunah hmang thei se, jail chhung boruakin hma sawn piah lamah jail tangte tan pawh nunphung pangngaia kir lehna remchang a awm thei ang.

Hetih rual hian sorkar hian a ngaih­tuaha a ngaih­ven tak tak erawh a ṭul a, thuneitu lamin tih duh tak takna (political will) an neih ngat chuan kan jail neih tlem te hi ṭha zawka hman theih a ni ngei ang a, chutiang tur chuan sorkar hian ṭan la rawh se.