LPG home delivery-ah ṭan lak a ngai

Mizoram sorkar (FCSCA department) leh Indian Oil Corporation thu angin khawpuiah eirawngbawlna gas home delivery kalpui mek a ni. Mi tam takin an ṭangkaipui a, an kalpui tawhna vengah chuan mipui pawh an lawm thawkhat niin a lang.

LPG home delivery hi September 2019 aṭangin Aizawla College Vengah enchhin nan kalpui a ni a, chumi hnuah veng dangahte kalpui chhoh zel a ni. Kum 2022 tàwp lam aṭang phei chuan district headquarters tinah home delivery kalpui vek tawh tur a ni a; hei hi duhthlanna ni loin tih ngei ngei tur a ni.

Hetih lai hian, district khawpui dang chu sawi loh, Aizawl khawpuiah ngei pawh gas home delivery la tih lohna veng a la tam mai. Gas home delivery la kalpui lohna vengah hian khawtlang hruaitute leh an bialtu gas agency/distributor-te'n ṭan an lâk lehzual a ngai.

LPG home delivery kalpui tawhna vengah mipui an lawm zel a; la kalpui ve lohna veng mipui pawhin an nghakhlel tlang hle niin a hriat. Harsatna sawi dawn chuan sawi tur neuh neuh a awm ang a; mahse, a harsatna lai hmu lian loin, tihhlawhtlin theih a ni tih ngaihtuahna nen tihhlawhtlin dan kawng zawn tur a ni.

Sorkar kal taa Supply Minister khan August 10, 2023-a press conference a neihah, LPG home delivery chu gas agency zawng zawngin an tih vek tur (mandatory) a nih thu te, consumer-in a book aṭanga darkar 48 chhungin mi dangin book ve lo mah se, an deliver tur a nih thu leh an deliver loh chuan thuneitute hnenah complaint theih a nih thu te, consumer-te ina an deliver-naah a bûkna ken ngei tur a nih thute a sawi.

Supply Minister-in gas home delivery kalpui dan tur a sawite hi mipui, consumer-te tana hamṭhatna leh remchanna hlir a ni. Mahse, tuna home delivery kalpui tawhna veng ṭhenkhatah chuan an zâwm ṭha lo hle niin a lang a, gas agency-te'n zawm ngei thei se a duhawm hle. Khawtlang hruaitute pawh an bawhzui a ngai ang a, chak zawka hma an lak a ngai àwm e.