Hnathawhnaah fimkhur a ngai

Tun hnaiah Mizoramah Covid-19 positive hmuh belh zel an ni a, tun hnaia positive hmuh chhuah mi tam tak hian symptoms an nei a, an kaina hriat a ni lo. 

Covid-19 avangin kan nunphung a buai a, hun rei tak chhung hna thawk mumal thei loin kan awm. Tunah chuan loh theih lohna avangin hna kan chhunzawm leh deuh vek tawh a, hei vang hian hri hi a hlauhawm ta lo sawt a ni lo tih mipuiten kan hriat a ṭha khawp mai. 

A nihna takah chuan Covid-19 hläu em èma kan inkhung ṭhin lai ai khan tunah hian a hlauhawm tawh zawk angin a sawi theih a, hun rei tak chhung positive hmuh chhuahten symptoms an neih mang lohlaiin tun hnaiah chuan symptoms nei an ni ta nual mai a, hei vang hian fimkhur a ṭul zual a ni. 

Sorkar chuan fimkhur takin rua-hmanna a siam a, hnathawhna hmuna zawm tur inkaihhruaina fel tak a duang a, he mi zawm hi mitin mawhphurhna a ni. 'Covid-19 hi chenpui thiam a chi tawh e' tiin an sawi ṭhin a, kan duh emaw duh lo emaw tunah chuan kan chenpui ta chu a ni a, hnathawhpui thiam pawh kan zir a ngai a, kan hnathawhnaah ṭheuh sorkar inkaihhruaina zawm chungin i fimkhur tlâng ang u.