Mahni hna hriat chian

Mizoram Journalist Asso­ciation (MJA) din champha vawi 43-na lawmnaa thusawitu, MJA president Vanlalrema Vantawl chuan mahni hna hriat chian hmasak a, mahni hna dik tak thawh a pawimawh thu a sawi. Journalist-te fuihin mahni hna pawn lam thila buai vak lo tur leh journalist hna dik taka rilru pe turin a chah.

Mizorama kan buaina lian tak pakhat chu mahni hna bak kan thawk nasa lutuk hi a ni. Kohhran leh tlawmngai pawla kan inhmanna hi chu kan hna ni loin kan inpekna thil a ni a, theihtawp kan chhuah tur a nih rualin mahni hna zawk kalsan leh tiṭha hman lo khawpa inhman hi a fuh ber lo ang. Mahnia eizawnna bul ṭan tawhte'n an inpekna vanga an hnathawh hun kalsana pawla an inhmang hi chu thil dang daih a ni a, sorkara thawk chung leh company/ private firm-a inhlawh ni chung sia hna kalsana inhmanna tur neih ngah lutuk hi a awm thei a, inenfiah a ngai hle.

Pawl pawhin kan hna kan hriat chian a ngai. Zirlai pawlin a buaipui tur chi a awm a, chutiang zelin hmeichhe pual bik pawlin an ngaihven âwm tak a awm leh a, YMA-te thlengin kan inrawlhna âwm leh âwm lo kan thliar a ṭha hle. Kan pawl neih ṭhenkhatte hi chu an pawimawhna leh an ṭangkaina a zualzel a, sorkar lam thlengin pawl aiawha an tel theih dan a awm ta zel a, heng thilahte pawh hian kan telna âwm a nih leh nih loh pawl hrang hrang hian an hriat chian a hun tawh hle a ni.

Mizorama kan kal danah hian 'voluntary' tia kan kalpui tam tak hi mahni hun âwla kan thawh ni lo, kan eizawnna aia kan thlan ni bawk si lo, kan eizawnna tibuai khawpa kan thawh hi a awm a, hei hi kan inenfiah tlan a ṭha khawp mai. Eng tak hi nge kan thawh tur ni a, eng hnathawk mi nge ka nih tih thlenga kan inenfiah ngam a ngai a, mahni hna kan hriat chian a ṭul khawp mai.