Zirtirtu zalen

Education minister H Rohluna chuan, "Zirtirtu ṭhenkhat social media leh kawng danga sorkar mawng hlim chingte, Code of Ethic kal pela mahni duh dana then mai mai ching an awm ṭhin hi a pawi hle. Sorkarin hengho hi a en liam mai mai dawn lo. Zirtirtu mahni hnaa in pe hmuh tur tam tak an awm a, anniho hi chu ka ngaisangin ka zah hle," a ti.

Mizoram sorkar hnathawk zinga an chanchin sawi hlawh ber pawl chu zirtirtute hi an ni a, an hna a pawimawh vang a ni ngei ang. Zirtirtu ṭha ṭangkaizia leh zirtirtu ṭha lo chu veng leh khaw pumin an tawrh theih dan hre chiangtu chu mipuite kan ni a, hei vang hian zirtirtu hi chu an che vel kan en chiangin kan ngaihven hle reng a ni.

Mizoram sorkar hnuaia zirtirtu ṭhahnem tak hi khawtlang leh kohhran hruaitu an ni nghal a, hei vang hian an ṭangkai dan pawh a thuah hnih hle. Sorkar hna an thawhna lamah an ṭangkai a, naupangte zirtirtu pawimawh tak an ni a; khawtlang leh kohhran hruaitu an nih tel phei chuan chhawrna tur an tam em em a, an pawimawhna hi a sang hle a ni.

Hetihlai hian zirtirtu ṭhenkhat, khawtlang leh kohhran lama an nihna zawk dah pawimawh a, mahni hna lam thlahthlam lek lekte pawh sawi tur an awm a; khawtlang leh kohhrana ṭangkai viau si, an zirlaite tiṭha thei der si lote thlengin an awm ṭhin a, hei vang hian zirtirtu tana pawimawh hmasa ber chu zirna in enkawl a ni tih inhriattir nawn hi a ṭha hle.

Zirtirtu ni si, kohhran hruaitu pawimawh a nih tel tawh chuan office lama hotute tan pawh an zahawm lêt riau a, an hnaah ber thawk ṭha lo mah se thil danga an nihna vangin hauh leh zilh pawh huphurh-awm tak an ni. Zirtirtu ṭhenkhat phei chu mahni khuaa vawk lal len, anni aia hlawh sang pawh awm bik lote an nih bawk avangin tu thuhnuaiah mah awm lo ang maiin an khawsa a, zalen takin an awm phah fo.

Zirtirtute hi an pawimawh a, an hnain a ken tel vang pawh a ni ang kohhran leh khawtlangah pawh mi pawimawh tak tak an ni hlawm a; nimahsela hei hian an hna aṭanga inthlahdah turin zalenna a pe lo tih hre tel se, zirtirtu hna pawimawh leh hna hmasa chu zirlaite ṭha taka zirtir a, result ṭha tak neih a ni tih hriat nawn fo a ṭul.