Thawh duh lohna nei sorkar hnathawk

Health minister Lal Thanzara chuan, sorkar hnathawk ṭhen­khat awm duh lohna leh thawh duhna bik nei an awm ṭhin chu vanduaithlak a tih thu a sawi. Health department-a medical officer atana lak thar doctor 27-te puala Aizawl Civil Hospital conference hall-a training-ah he thu hi a sawi a ni.

Mizorama thil vanduaithlak tak chu sorkar hnathawkte'n thawh duhna hmun bik an nei a, thawh hrehna hmun bik an nei ṭhin hi a ni. Hei hi Mizorama zirna siam ṭhat a ṭul chhan lian tak pakhat pawh a ni a, sorkar sikula zirtirtute hi thingtlang khaw kil zawkahte hian awm duh se thingtlanga zirna pawhin a ṭhatpui ngei ang a, tun anga khawpui pan zel hi a ṭul bik kher lo ang.

Sorkar hna hrang hrangah hian thingtlanga awm ṭulna bik hi a awm ṭhin a, hengahte hian hnathawktu lam an inpek a ngai hle. A bikin Health department leh School Education depart­ment-a hnathawktute hi khaw hrang hranga post nei an ni a, thingtlang khaw kilkhawr deuh thlengin awmna an nei a; nimahsela an awmna tur hmuna an awm duh loh avangin thingtlang mipuite'n harsatna an tawk nasa ṭhin hle a ni.

He thilah hian sortkar thuneitu lamin ṭan an lak a ngai a, huaisen taka thil an kalpui loh chuan mahni hnathawkte thunun zo lo angah an chhuak mai ang.

Tunah hian hna­thawktu awm loh avangin thingtlang hmun tam takah harsatna an tawk a, hei hi sorkar hian thlir liam mai ṭhin lo se, sorkarin a dahna hmuna awm duh lo sorkar hnathawkte chungah khauh takin thununna lek ngam rawh se.