Kan phak tawka ṭanlak

Reserve Bank of India (RBI) chuan tun hnai khan Financial Literacy Week an buatsaih a, an thupui chu 'Micro, Small and Medium Enterprises' (MSME) tih a ni. He hun hmanpuitu chief secretary chuan, MSME chu Mizoram tan a pawimawh tih sawiin, "Industry liante hi eizawnna hna siam kawngah thawh hlâwk ber an ni ngai lo, MSME anga sum­­dawnna tê zawk leh a laihâwlte hi eizawnna tam tak siamtu an ni zawk," a ti a; Mizorama entre­prenuer-te chu trading aiin business lam uar tura a duh thu leh, mi zawng zawng huap zo financial service tipuitling turin Mizoramah ṭan lak a ngaih thu a sawi. 

Mizorama kan buaina lian tak pakhat chu miin 'hna a hmù,' kan tiha sorkar hna hmute kan kawhtir bîk tlat ṭhin hi a ni. Hun rei tak chhung chu sorkar pawn lamah eizawnna nghet a awm lo emaw tih mai turin kan kal a; sumdawng ni lo sorkar behchhana supply leh contract hna thawk an awm leh a, politics kal tlanga ei hmuh tum an awm a, a bak chu kuthnathawktute an ni leh deuh mai. 

Hetihlai hian India ram state dangahte chuan an ban phak tawk thil siam chhuahte neiin mahnia eizawn bakah midangte tana eizawnna siamsaktu an pung zel a, chu chuan state thawh chhuah a tisang a, an state-in an ṭhatpui 

ṭhin. Mi hausa tawn­taw leh company lian ni kher lote pawhin hemi kawngah hian an thawh hlawk hle a ni. 

Mizote hian indus­try kan tihin mi hausa­te thawh chi bika ngaih industry lian thama bul ṭan kan tum ṭhin a, industry lem siama sum lalut an awm ve reng bawk. Tun hnaiah erawh mahni phak tawka eizawnna bul ṭan a, MSME lama ke pen nachang hria ṭhangthar an pung ta zel a, a lawmawm hle. 

Chief secretary sawi ang hian industry lian ringawt kan nghah chuan kan ramah nghah chhuah tur an awm har deuh mai thei; chutihlaiin mahni bân phak tawk eizawnna dap a, fing leh remhre taka thawh chuan mahni ei tur bakah midangte eizawnna siamsaktu a nih theih a ni.