Kawng chhia siam tura inrin lâwk

PWD Minister chuan September 2, 2024 khan ZPM pisaa thu a sawiah, Mizoram hmun hrang hranga kawng chhiatzia leh siamṭhat a ṭulzia a hre chiang a, khaw awm danin a la zir loh avangin siam mai theih a nih loh thu a sawi a; kawng chhiate thawm ṭhat mai theih a la nih loh avangin mipui hriatthiamna a ngen.

Mipuiin kawng chhia, khuar nasa tak tak kan hmu a, siam a ṭul tih kan hria a, sorkar che turin kan beisei a, kan phût a ni. PWD Minister-in a sawi ang hian sorkar hotute, PWD Minister leh a hnuaia thawkte pawhin hmun tam takah kawng a chhia tih te, siam a ṭul a ni tihte an hre chiang hle ang.

PWD Minister-in kawng chhiate thawm ṭhat mai theih a la nih loh chhan chu ruahtui a la tlâk reng vang a nih thu a sawi a; "Khaw awm danin a zir miau loh avangin mipui pawhin min hriatthiam ka beisei," a tih hi mi zawng zawngin kan pawmpui vek lo mai thei a, mahse, an dinhmun hi kan hriatthiampui ve erawh a ṭul. Keini ang bawkin kawng chhia an ning ve hle ang, siam thuai thuai pawh an duh ngei ang.

Kawngpui chhia hi fûr lai chuan kum tin a awm ṭhin a; eng party pawhin sorkarna chelh se, kawng chhiat lai hun a awm vek. Kawng chhia hi a lo langsar bik bawk nen, eptu party apiangin sorkar lai party demna leh sawichhiatna atan an hmang ziah a; thil âwm lo a ni lo. Political party-te hian thil nihphung an hre thawkhat a, sorkar an nawr danah an hun lai hre chunga sorkar leh official-te tiphûr zawnga an chêt thiam a ṭulna chin a awm àwm e.

Kuminah ruahrui a tla tam zual a, kum eng emaw ti chhung chu kum dang aiin a tla tam zawk daih ni pawhin a lang. Hei vang hian kawngpuite pawhin a tuar lo thei lo a, kawng chhia thawm ṭhat chungchang pawh a nghawng rêng a ni.

Mipuite'n kawng chhiate thawm ṭhat hun an nghakhlel tak zet a, kawngpui ṭhaa tlân an châk tawh em em. Hei hi hriain sorkar hotute leh PWD-te hi kawng chhiate siam theih a nih veleha siam nghal char char thei turin tun aṭanga an inrin lâwk a ṭul a, chhuanlam siamna chi a ni tawh lo ang.