Dan loa hnam dang sumdawng

Mizo Zirlai Pawl chuan tun hnai khan Khatla leh Tennis Court bul vela dan loa hnamdang sumdawngte dap hna an thawk a, hnam dang dan loa sumdawng mi 11-te dawr an khârsak. Hei hi MZP General Assembly-a 'Mizoram chhunga hnam dang dan loa sumdawngte dapchhuah a, a ṭul anga hmalak ni rawh se' tia an lo rel tawh bawhzuina a ni.

Mizoramah hian hnam dang tan sumdawn a theih loh a ni ber a, dan anga sumdawng thei chu mi tlem te an ni. Hetihlai hian sumdawng zingah hnam dang tam tak an awm tih chiang taka hmuh theih a ni. Heng sumdawng ṭhenkhat hi chuan Mizo hming an hawh a, a pawi hle a ni.

Dan loa sumdawngte dap chhuah hna hi sorkar lamin an thawh tur a nih hmel a, Police, Trade and Commerce lamte hna tur niawm tak a ni a; nimahsela Mizoramah chuan NGO lamin dan loa sumdawng dap chhuah hna hi an thawk fo ṭhin.

Tuna MZP-in dan loa sumdawng dap chhuah hna an thawk hi thil lawmawm tak a ni a, hei hi Mizoram leh hnam tan thil ṭha tak a ni. Hetih rual hian an kal danah dan hnuaiah thil engkim kalpui zel se, dan loa sumdawngte dap chhuah hna hi dan loa kan kalpui mai lohna turin fimkhur thiam a ṭul hle ang.

Mizorama Mizote kan him theihna turin dan ṭha tak kan nei a, chumi dan bawhchhia a dan loa hnam dang sumdawng an awm fo hi chu sorkar hian tun aiin ngaimawh deuh se, Mizoram chhunga hnam dang dan loa sumdawnna awm ṭhin hi tihtawp ni rawh se.