Zo phuar khawmtu Mizo

Chief Minister-in September 2, 2024 Maryland, USA-ah Mizo Day a hmanpui a; Mizo (Zo hnahthlak) hnam zingah mahni hnam hminga Mizo tih hmang an awm loh thu te, Mizo tih chu Zo hnahthlak zawng zawng huap hnam hming a nih thute a sawi.

Mizo hnam chungchang hre ril zawkte chuan Mizo tih hi Lusei ta bik ni loin, Zo hnahthlak zawng zawng ta, hnam pêng hrang hrangte khaikhawmtu a nih thu an sawi ṭhin a; USA Mizo Day-a Chief Minister sawi dan nen pawh a inmil chiah a ni.

Chutih laiin, Zo hnam péng ṭhenkhat chuan Mizo tih hi Lusei sawina bikah an ngai niin a lang a, chuvang chuan Mizo tia inpawm harsa tite pawh an awm a ni mai thei.

Hre thûk zawkte leh Chief Minister pawhin a sawi ang hian, Mizo tih hi Zo hnam péng hrang hrangte khaikhawmtu leh phuar khawmtu atan pawm tlang thei ila a ṭha hle ang. Chutiang zawng chuan mahni hnam bil emaw, chenna bial bikah emawte inzirtir thei ila thil ṭha a nih a rinawm. Hei hi Zo hnahthlak pêng hrang hrangte inunauna leh inpumkhatna thlen theitu ṭha leh remchang ber a ni âwm e.

Mizo ṭawng kan tih, ṭhenkhatin Duhlian ṭawng an tih bawk hi Lusei ṭawng kal zel a ni mai thei a; chutih laiin, Lusei ni lo Zo hnam pêng hlawm lian tak tak dangte pawhin ṭawng bik an neih hlawm avangin Lusei ṭawng (Duhlian ṭawng) hi Mizo ṭawng emaw, mahni ṭawng ang ang tak tura pawm emaw harsa ti an awm niin a lang bawk.

Zo hnahthlak péng hrang hrangte hi inhlawm khawm ṭha a, inunauna tingheta inpumkhat lehzual tur chuan ṭawng a pawimawh em em. Tuna a lan danah chuan Mizo ṭawng kan tih tâk deuh ber, Duhlian ṭawng hi hnam péng zawng zawngin thiam vek lo mah ila, kan thiam tlangláwn ber a nih avangin Zo hnahthlak zawng zawng huap zo ṭawng (common language)-ah thinlung takin pawm thlap thei ila, Zo hnam kal zel tur atan thil ṭha zawk a nih a rinawm.

Hetih rual hian, Zo hnam péng hrang hrangin ṭawng bil kan neihte kan pawm thiam a, kan inzahsak thiam a ṭul reng dawn a; Mizo ṭawng (Duhlian ṭawng) hmang mar ṭha thei lo deuhte pawh hmu hé mai lo a, kan hriatthiam a ṭul hle bawk.