Sorkar leh inrenchem

Finance minister chuan, Council of Minister leh parlia­mentary secretary-te'n muster roll an rawih theih zat tihtlem tum a nih thu a sawi a; Governor, Chief Minister leh Assembly Speaker-te bak thlawhtheihnaah executive class-a chuang lo tura tih an nih thu Assembly House a hrilh.

Mizoram sorkarin sum har­satna a tawk mek a, hetihlai hian sorkar thuneitu sangte sorkar tihek thei turin an lo awm ve zel bawk si a, a pawi hle a ni. Tunah chuan sorkar thuneitu lam pawh an harh ta a, muster roll an kawl ṭhinte chu tihtlem an tum a, an zin veivahnaah pawh thlawhtheihna chuan man tlawm zawka zin an tum a, hei hi thil lawmawm tak a ni.

Hetihlai hian Mizo­rama thil buaithlak tak chu MLA leh MLA chawl tawhte tana hamṭhatna a tam lutuk hi a ni a, anni enkawlna atana sorkarin a sum sen hi a tam tham hle. Dan siamtu rual an nih avangin an hamṭhatna tura dan an siamin hnialtu an awm ngai lo a, MLA an nih tawh loh hnu thlenga sorkar aṭanga duhsakna an dawn zozai hi a tam tham a, hengte thleng hian ennawn theih ni se a ṭha ngawt mai.

Hemi piah lamah hian sorkar official-te chet dan hi tun aia khauh zawka khuahkhirh leh ennawn a ṭul a, officer ṭhenkhat an fate lehkha zirna hmuna remchang taka meeting leh office dawr tur an insiamsak thei mai ṭhin te, an zin veivahna senso sang lutukte hi tihtawp a ṭha khawp mai. Chief minister ngeiin zin dawna pawisa ṭhâm ching an awm thu a sawi dum dum a, chung mite an hrem thu erawh hriat zui a ni ngai lem lo a, sorkar official-te hian sorkar pawisa hi ṭul loah an ei nasa hle.

Sorkarin inren­chemna lam kalpui a tum a, anmah-ni aṭanga ṭanin muster roll titlemin ṭan an la dawn a, hmasawnna lawmawm tak a ni. Hei hi duhtawk mai loin sorkar official-te chet dan pawh hi ngun zawka chhuiin endik thei se, Mizoram sorkar sum hi tam tak chu a la hum theih ngeiin a rinawm.