Vanduaina, pawi khawihna leh politics

HPC (D) nia rinte chuan tun hnai khan Mizoram MLA pathumte telna, Assembly Assurance Committee-te zin veivak chu silaiin an kap a, anmahni vengtu police pathum an kap hlum a, mi paruk dangin hliam an tuar.

Mizoram chhunga he pawi­khawihna thleng hian Mizo mipuite rilru a tina takzet a, sorkar hotute pawh an thinurin chhân lêt a nih tur thu an sawi. He pawi khawihna hian Mizoram chhung a nghawng a, mi tam takin an dem thu an au chhuahpui a, a demawm takzet a ni. Tunlai thiamna ṭhang zelah social media hmangin ngaihdan chi hrang hrang thehdarh a tam hle.

Hetiang thil a lo thlen hian mi tin kan fimkhur thiam a ṭha a, kan thinurna leh kan demna thu kan au chhuahpui rual hian hnam leh hnam inkar boruak tichhe thei, pawikhawihtu ni ve lo an hnampuite tana ngaihthlak leh chhiar hrehawm zawnga thil thehdarh loh tum hram a ṭha hle. Tute'n emaw pawi an khawih tak avanga an chipuite vaihmaa beih chiamte hi thil ṭha ber a ni lo a, hei hi pawi sawilote tuarna ang deuh bawka pawi khawih lote rilru tihnat belhna a chang thei.

Political party tan pawh insûm hun a ni a, ṭan rual hun a ni bawk. Politics-ah chuan ngaihdan a inang thei tak tak lo a, lamṭang inchuhna leh thuneihna inchuhna lam a nih vangin inbeih leh insawisel hi a ken tel ang deuh a ni thei. Hetih rual hian tun ang thil thlengah hi chuan tu political party mah hian hamṭhatna dawn tum lo se, tute emaw beihna remchang leh fakna hun ṭhaah chantir lo se, kan ngaihdan ang veka thil a kal lo a nih pawhin indem leh insawichhiat hun a ni lo a, ṭan rual hunlai a ni e.

Politics a nih tawh hi chuan eng­kim mai hi a lenga ngaihna kan nei lian hle a, chu chu politics kan kalpui dan pawh a ni. Tun ṭuma vanduaina thlengah hi chuan kan thuchhuah siam turah te pawh insum thiam ila, kan ṭawng chhuah turah pawh fimkhur ila, kan party hlawkna leh party dangte chhiatna lam aiin Mizoram tana ṭha ber dah pawimawh hmasak tur a ni ang.