Zodin chei tum hi

Zodin Cinema Hall ṭhina Multi Level Car parking leh Multi Utility Centre sak turah UD&PA department chuan architechtural drawing inelna an buatsaih. Intihsiak lawmman semnaa thusawitu UDPA Mi-nister chuan, Aizawl ti-Aizawltu atan Zodin siam danglam a ni dawn tih a sawi.

Mizoram khawpui ber Aizawlah mi-hring cheng an ṭhahnem tawh a, khawpui a tawt a, lirthei a pung zel a, traffic jam a nasat bakah motor parking a vang hle. Khawpui kawngpui lunlaiah phei chuan lirthei hunna hi a awm tawh meuh lo a ni ber a, Aizawl khawpui hian parking a mamawh belh nasa hle.

Sorkar ruahman ang chuan Zodinah hian lirthei hunna hmun lian tak siam a ni dawn a, hei bakah hian kawng hrang hranga hman ṭangkai theih building sak a ni bawk dawn. Hetiang ruahmanna a awm hi a lawmawm a, hun rei tak thlir chungin he building hi sak ni se a ṭha hle.

Aizawla thil vang tak chu hmun âwl (space) hi a ni a, Zodin pawh hi building-in an sa khat leh vek ang tih a hlauhawm hle. A hmunhma hi lirthei hunna atan an siam dawn a nih chuan a building pawn lamah pawh hmun awl zuah tel thei se, kawngpui leh building insi deuh veka sorkar building pawh kan sa zel mai hi chu a pawi khawp mai.

Aizawl khawpui hmel lanna ni thei tura beisei, khawpui hmun lailiah lirthei hunna tur leh ṭangkai danga hman tur building sak a ni tur hi a lawmawm a, hei hi ram rotling ni turin buatsaih ni ngei se, ngaihtuahna zau zawk nen hun lo kal zel tur thlir chungin hmun âwl zuah nachang hre tel se a ṭha ngawt mai.