MLA fund

Mizoram Legislative Assembly-a member 40-te'n an bial chhung hmasawnna atana sum an dawn chu kumin aṭangin a lêta tihpun a ni a, cheng nuai 100 a ni tawh a; sorkar chuan kum khatah MLA 40 tan cheng nuai 4,000 a sêng dawn.

MLA-te'n an bial chhunga hmasawnna hnathawhna atan kum khatah cheng nuai 100 an nei tur hian hmasawnna a thlen beisei ila, MLA meuhin anmahni puala sum hmuh hi ṭha takin an hmang ngei turah i ngai ang. Bial 40-ah cheng nuai 100 ṭheuh hna-thawhna turin an nei dawn a, awmze neia dik taka hman a nih chuan hnathawh tak takna tham sum a awm dawn tih a chiang tawh a, MLA-te chet zui dan mipuiin an thlir dawn a ni.

Heng pawisate hi mipui pawisa a ni a, MLA-te kaltlanga pek chhuah a ni mai dawn a, hei hi MLA lam hian an hriat chian a pawimawh. An duha an hman turin cheng nuai 100 an kawl dawn a ni lo a, an bial chhunga hmasawnna hnathawhna turin mipui pawisa nuai 100 hman theihna an nei a ni chauh zawk a, hei hi an man fuh loh chuan duhsak zawngte hnathawhna atan an sem ral ang a, awmze nei loin a tham ral vek thei.

Mizorama thil pawi tak mai chu political party worker-te hi contractor emaw an inti vek zel a, pawisa awm ang ang hi contract hnathawhna atan an inchuh zo mai ṭhin. MLA-te chang an ni lo a, ADC lam leh AMC-a hruaitute pawhin he thil tho hi an kalpui a, a van-duaithlak khawp mai. Hmasawnna hna lian tham thawh theihna tur pawisa awm hi hna tenau te te atan an sem zo a, a tawpah pawisa hmang zo vek siin an hnathawh sawi tham a awm meuh ṭhin lo.

Bial chhung hmasawnna atan an hmang dawn nge, an duhsak zawng political party worker-te hnathawhna tur an siamsak dawn, tihte hi mipui ngaihven tur lai chu a ni dawn a; MLA-te hi mipuiin an thlir reng dawn a, an kuta mipui pawisa cheng nuai 100 awm an hman dan aṭangin mipuiin an teh dawn a ni.