Document lem leh Mizoram

MZP hruaitute chuan, National Institute of Open Schooling (NIOS) hnuaia mi, Southern Higher Secondary School, Sikulpuikawn chuan marksheet lem an siam ṭhin niin an sawi a; zirlaite hnena senso tam tak an laksak hnuah marksheet lem siamin, result nei miah lo hnenah result lem leh do­cument lem an pe chhuak ṭhin, an ti.

Tun hnaiah Mi­zoramah thil thar, tun hmaa la hriat zen zen loh a chhe lam a thleng fo a, chung zinga langsar tak chu 'document lem' siam hi a ni. Hei hi tun hma deuh aṭang tawhin ṭhen­awm state ṭhen­khatah chuan a hluar hle a, Mizorama kan seng lut ve ta hi a pawiiin a zahthlak takzet a ni.

Hna dilnaah pawh mi tam tak chuan document lem hman an hnial tawh lo niin an sawi a, LSC lem, driving license lem, motor registration tihna lem thlengin a awm. Hei hi tunah pawh buaina thlentu lian tak a ni mek tawh a, tun ang zela document lem hi a hluar a nih chuan buaina lian zawk a la hring chhuak dawn niin a lang.

Hna zawnnaah pawh harsatna a siam thei tawh a, tun ang zela document lem hi a tam chuan hnathawhna hrang hrangah pawh kan buai phah dawn hle a ni. Hei hi Mizoram tan thil pawi tak a ni a, mahni nihna ang lo taka lan tum a, dawta nihna lei theih anga a awm ta hi a vanduaithlak khawp mai.

Zirlai zingah pawh document lem hmang hreh lo an awm a, chu document lem siamsak duhtu an awm lehzel chu a vanduaithlak hle a ni. MZP-in thil dik lo an hai chhuak hi a lawmawm a, hei aia thuk hian chhui zel se a ṭha hle a ni.