Zirtirtute hi zah tur an ni

Nimin September 5 kha Zirtirtute Ni (Teacher's Day) a ni a, Mizorama sikul hrang hrangte'n hmangin, zirlaite'n an zirtirtute zahna chibai bûkin, chawimawina thilpekte an hlân a ni. Teacher's Day hi India President pahnihna leh zirtirtu ropui Dr Sarvepalli Radhakrishnan (1888–1975) pian champhaah kum 1962 aṭangin hman a ni ṭhin.

Teacher's Day a lo thlen hian zirtirtute pawimawhzia te, mihring bakah ram leh hnam hmasawnna tura a bulṭhut an nih thu te, mi tin hnena hriatna leh thiamna petu an nih thute sawi a ni ṭhin. Zirtirtute pawimawhzia leh mi tin deuh thaw hnena thiamna petu an ni tih hi hriat chhuah reng a har a; an puala ni bikah an pawimawhzia kan inhrilh thar ṭhin te, mahni zirtirtu ṭheuhte hlutzia hriat chhuah tharna nía kan hmang ṭhinte hi a ṭha em em.

Mi tam ber hi zirna sikula lut tawh kan ni ngei ang a, zirtirtu nei tawh deuh vek kan ni ang. Kan zir thlen chu eng pawh ni se, zirtirtute zirtir chhuah kan ni deuh vek tihna a ni. Khawvela mi thiam ber berte pawh tute emaw zirtir chhuah an ni vek a; tuna kan nihna ang ṭheuha thiamna leh hriatna kan neih tam tak hi zirtirtute zara kan neih a ni. Hei hian mihringte nuna zirtirtute pawimawhzia a tichiang âwm e.

Eng anga hausa, ropui leh lal pawh ni ila, zirtirtute zirtir chhuah kan nih vek avangin zirtirtute hi kan zah tur a ni. Zirna-in kan kài hun lai ṭheuha kan zirtirtute kha tunah keini aia thiam lo zawk, rethei zawk, lal lo zawk pawh ni se, anni zara kan tun dinhmun ṭheuh thleng thei kan ni a; kan zahin kan chawimawi thiam tur a ni a, chu chu 'mi fing' nihna chi khat a ni.

Zirtirtu ni mekte pawhin an pawimawhzia an hriat thar a ngai. Zirtirtute pawimawhzia te, hnam lungphùm phúmtu an nih thu te, zah thiam an ṭul thute kan sawi lai hian, anni pawhin an pawimawhzia an hriat a, zah tlâka an awm ve a ṭul.

Zirlaite thiamna pek mai bakah a ṭha zawng leh chhe zawnga zirlaite nun kaihruai theitu an nih avangin, zirtirtute hian an nun an uluk reng a ngai a, zirlaite entawn tlaka an nun a ṭul. Inpekna thûk zawk nen ṭhahnemngai takin thawk zel se, ram leh hnam tan an hlu zual zel dawn a ni.