Mizoram leh Larsap

Mizo Zirlai Pawl (MZP) chuan sorkar laipuiin Mizorama Governor a thlak zing lutuk chu hriatthiam harsa an ti a, Mizo mipuite hmuhsitna leh thamlohnaah ngaiin lungawi lohna lantir an tum.

Tun hnaia Mizorama Larsap an ruat dan en hian sorkar laipui hian Mizo mipuite hi a tham lo hle nia ngaih loh theih pawh a ni lo. Sorkara Larsap dinhmun kan hria a, sorkar thuneitu lu ber an ni. Mizorama Larsap an dah dan leh an ban ngun dan en hi chuan sorkar laipui hian Mizoram hi min ngai pawimawh lo hle niin a lang a, a zialo hle a ni.

July 6, 2014-a Vakkom Purushothaman a chhuah hnua Larsap pali ngawt mai kan nei hi a mak zozai hle mai a, hei hian sorkar laipuiin Mizoram a en dan pawh a lang chiang hle a ni. Sorkar laipuiah sorkarna a inthlak hi chuan state hrang hranga Larsap-te hi chu an inthlak châwk a; nimahsela tun hnaia Mizorama larsap lut leh chhuak insûlpêl nuk nuk ang hi chu a awm ngai kher lo ang.

Mizoram sorkar tan pawh thil zah­thlak a tling a, Mizo mipuite tan lung­awi lohna tham a ni. MZP-in Larsap inthlak sek avanga lungawi lohna lantir an tum pawh hi thil âwm lo a ni lo a, tun ang zela Larsap nghet nei hleithei loa Mizoram an siam zel a nih chuan Mizo mipuiin sorkar laipui a ngaihdan pawh a inthlak hret hret thei a; Larsap nghet neih hi Mizo mipuite hian kan phû a, hei hi sorkar laipui pawhin hre rawh se.