MNYF-in kawng chhia an siam thu

Aizawla kawngpui chhiate chu September 5, 2024 khan Mizo National Youth Front chuan hnatlangin an thawm ṭha a, a rang thei ang bera kawng siam turin sorkar an phût. Rorel lai ZPM Ṭhalai chuan MNF ṭhalaite'n kawng chhia an siam chu fakawm an tih thu leh, an sorkar laia an harh chhuak zo lo chu pawi an tih thu an tarlang ve bawk.

Kumin fûr hun eng emaw ti aṭang khan Aizawl khawpuia kawngpuite a chhe viau mai a; highway leh khaw kar kawngte hmun tam takah a chhe viau bawk a, hmun tam takah lirthei tana tlân hleih theih loh khawpa chhiate a awm.

MNYF-in kawngpui an thawm ṭha hian ṭhatna tak a nei thei a, ṭhatna a nei teh chiam lo thei bawk. Politics thilah an party-in an hlâwkpui theih nan leh sorkar lai party tihmualphona a nih beiseia an tih a ni mai thei a; chutiang ni ta se, mipui náwlpui rilruah an hlawhtling ang em tih erawh ngaihtuah tham tak a ni.

PWD Minister-in kawngpui a chhia tih leh siam a ngai tih pawh an hria a, mahse, ruah a la sûr reng avangin siamin awmzia tak tak a neih rih loh avangin an la siam loh thu a lo sawi tawh. Chutih laiin, MNYF lamin ṭhahnemngaiin an siam a, mahse, an siam ni tlai lam leh a tuk lamah chuan a khuar chhe leh nghal mai niin a lang.

MNF party mite'n kum 2012 July thla khan Champhai Awmpui Pheiah kawngpui chhiat vangin buh an lo phun chiam tawh a; December 14, 2012 khan power supply ṭha lo vangin Aizawlah bati an sem chiam tawh bawk. Heng bakah hian sorkar duhkhawp lohna avangin hmalakna eng eng emaw an lo nei tawh ṭhin.

Hun kal tawhte leh tun hnai maia MNF party mite hmalakna hi political game chi khata ngaitu mipui zingah an awm nual niin a lang. September 5-a MNYF-in Aizawla kawngpui an siam pawh hi mipui hmangaihna leh duhsak tak takna vang nge, sorkar tihmualpho tumna leh politics thila hmingṭhat tumna tih pawh ngaihtuah theih tak a ni.

Engpawhnise, kawng chhia hi mipuiin an vei a, sorkar an ngaichang ṭhup mek. Khua a ṭhat a, siam theih a nih veleh chak taka siam nghal char char thei turin sorkar an inpuahchah lâwk a ngai e.