Organic farming leh Mizoram

Mizorama organic farming kalpui dan sawihonaah chief minister Lal Thanhawla chuan, organic certification neih a buaithlak thu a sawi a, kan kalpui theih tak tak dawn leh dawn loh zir chian hmasat ṭha a tih thu a sawi a, tuna organic farming kalpui ngawt chu arkhawthimdai a hlauhawm thu a sawi a, "Engtin nge kan kalpui ang tih ngaihtuah tlan a ṭul a ni," a ti.

Organic farming hi a hlawkna lam ringawt kan thlir chuan tih fuh loh ve theih tak tur a ni a, a hautakzia leh mithiamte'n 'organic certification' an pek tura a kalkawng thui­ziate pawh ngaihtuah tel a ngai. Organic farming hmanga thlai thar chhuahte a man a to a, hralh a kal tih chin ringawt kan inzirtir ang tih a hlauhawm a, a buaipui harsatziate thlenga sawi tel hi a ṭul reng a ni.

Hetihlai hian chief minister berin organic farming hi a hautakna lam ringawt a sawi mai ang tih a hlauhawm a, midang pawhin an kalpui theih chuan kan kalpui ve theih a nih thute pawh sawi tel se a ṭha khawp mai. Khawvel hmun dangah pawh organic farming hi an kalpui theih chuan Mizorama kan kalpui ve theih dan tur hi zir chian a ngai a, sorkar mithiam­te'n an tih tur an tih a ṭul.

Mizorama thil buaithlak tak chu mithiam tam takin a taka hna an thawk lo ṭhin hi a ni. Kan leidawh a tlo loh chhante leh kan building leh kan lungremte a ṭhat loh chhan hi chu engineer lamin an vil ṭhat tawk loh vang tih phat rual a ni lo. Chutiang bawkin agriculture leh horticulture lama mithiamte pawh hian lo leh huante hi a takin tlawh tam se, an thiamnate a taka hman chhuah tum se, chu chu ramin a mamawh chu a ni.

Organic farming hi a hlawk a, mi tam takin an din­chhuahpui tawh. Mizorama loneitute'n organic farming hi tluang taka an kalpui ve theih dan tur hi mithiamte hian ngaihtuah se, a theih dan tur zawngin ṭan la se, a ṭul chuan a hmunah kal chilhin a takin thawk rawh se.