Village Council inthlan

State Election Commissioner chuan Mizoram district paruka village council inthlan leh Aizawla local council inthlan tur hriattirna a chhuah a, April 30, 2015-ah inthlan tur a ni. Village council leh local council term hi kum thum ni tawh loin kum nga a ni tawh ang.

Mizoramah hian politics inkhaidiat dan hi a awm chho thliah a, chuta ngaih­thah hlawh ber nia lang chu a bul ṭhuta awm village council/ local council hi a ni awm e. Village level-a politics-a inawpnain ngaih pawimawh a hlawh loh dan en hian MLA inthlana kan bei ta chiam mai pawh hi a mak lo a, village council-te'n thuneihna (power) leh mawhphurhna (responsibility) an neih tlem avangin a bul ṭhuta kan inawpna hi a fel tawk lo hle reng a ni.

Veng leh khua hre chiangtu zawk kan VC leh LC-ten thu­neihna an nei sang lo a, an kuta pawisa hman tur awm phei chu a beitham hle a ni. Hetihlai hian khawtlang hre chiang lotu zawk MLA-te kutah engkim deuhthaw a awm a, khawpuiah chuan Municipal Council lam councilor-te an awm ve leh bawk. Heng kan MLA leh Councilor-te hian an hriat chian tawk loh hmunah ro an rel a, a bul ṭhut aṭanga an hriat chian loh avangin an rorelna pawh a fing tawk lo a, mipuiin an chhawr tur angin an chhawr phak lo ṭhin a ni.

Tuna VC leh LC kan kalpui dan hi vawi lehkhata thlak thut theih a nih loh avangin, 'Engtin nge VC ṭha leh LC ṭha kan neih theih ang?' tih hi ngaihtuah thiam pawh a harsa hle. Thuneihna an neih tam miau loh avangin VC leh LC tan ti ve mai maia term khat hman tluan theih a ni a; chutih rual chuan tih tak taka khawtlang rawngbawl duh tan erawh VC leh LC nih hi hmanraw pawimawh tak a tling a, khawtlang hmel thlak danglamtu pawh an ni thei.

Inthlan puan a ni ta a, political party tinin VC leh LC candidate tur an dap ṭan dawn. Hetih hunah hian party politics dahṭha a, khawtlang tana ṭangkai tur candidate thlan chhuah thiam a pawimawh dawn a, mi ṭha tan chuan VC leh LC nih hi khawtlang siamṭhatna pawimawh tak a ni thei a, mi ṭha vak lo kan thlan erawh chuan tih nei mang loin kum nga chhung an awm dawn ta a ang hle.