Vantlang kawngpui humhalh

YMA sub-headquarters, Serchhip chuan, Mizoram hmun hrang hranga NH-54 kawngpui kama Airtel company-in optical fibre cable (OFC) phûmna atana an lai khuar chu an ngaimawh thu an tarlang a; OFC phûmna tura lei laih vangin Aizawl-Serchhip tlangdunga lirthei tlan­te'n harsatna nasa tak an tâwk a, lirthei an chetsual phah fo tawh niin an sawi.

Kawngpui laih chhiat a nih hma hian Airtel lam leh PWD lamin inremna siamin ni khata an vûr nghal zel theih tur chin chauh lai tura tih an nih laiin, an lei laih khuarte hnawh lohin rei tak tak an awmtir a, hei hian harsatna a siam nasa hle a ni. Lirthei chet sualna a thlen bakah hian kawngpui a tizim a, zin veivak an tlan chak thei lo a, zin mite hun ṭha tam tak paihsak an ni.

Mizote hi thil pawimawhah hian a 'mawhphurtu' kan ni ngam lo hi a pawi a, kan kawngpui zawh ṭhin an lai chhia a, eng vanga lai chhia nge an niha eng tia siam ṭha leh tura inrem nge an nih, pawh kan hriatpui mang lo. Serchhip YMA lamin huaisen taka thil awm dan zawng chhuaka kawngpui an humhalh ngam hi an fakawm a, anni hian kawngpui lai chhetute leh siam leh tura inremna an siampuite chêt dan hi ngun takin lo vil zui zel se a ṭha ang.

BSNL hian an hrui phum turin vawi tam tak kawngpui an lai chhe tawh a, an siam zui nghal mai chang a awm a, hun rei tak siam ṭha loa an hnutchhiah chang a awm. Tunah pawh khawpui chhungah BSNL hrui hnawksak taka inthlung hmuh tur a la tam a, heng­te thleng hian a ngaimawhawmin kawngpui leh a chhehvel a tihnawk hle. Hei bakah hian private in sak leh hnathawh avanga kawngpui tihhmel­hem pawh tam tak a awm a, tui lakna pipe phum tura mahni remchanna hmuna kawngpui laih chhiat mai hreh lote thlengin an awm.

Kan kawngpuite hian hum­halhtu a mamawh a, sorkar department lamin an tih tur an ti lo a nih pawhin tlawmngai pawl, khawtlang hruaitu lamin mahni huam chhung ṭheuha kawngpui hi humhalh thei se a duhawm hle a ni.