Chanchinbu leh sorkar khalh ngil
IPR Minister chuan September 5, 2024-a Mizoram Journalists' Association member-te nen an inkawmnaah, sorkar chu khalh ngil an ngaih thu a sawi a, chumi kawngah chuan ṭan la tur leh RTI hmang tam turin chanchinbumite a chah.
Khawvelah hian mihring ṭha leh dik famkim kan awm lo a, sikul kai ṭan tìr rual aṭanga upa ber thlengin tihsual nei tawh vek kan nih a rinawm. Sorkar hotute pawh mihring ṭha famkim lo ve tho an nih avangin sorkar an enkawlnaah tih dik loh te, chet sualna te, tih hmaihte an nei ve ṭhin ngei ang. Kawng dik lo zawh theihna leh thil ṭha lo tih theihna chungchangah pawh fimkhur leh invên sên a har chin a awm thei.
IPR Minister-in khalh ngìl an ngaih thu a sawi hi a dik a, khalh ngìl leh vên ngai lo mihring an tam lo viau âwm e. Minister sawi dangin, chanchinbumite hian sorkar ṭha neih duhna tak tak rilru nen, ṭan bik, duhsak bik leh huat zawng nei loin sorkar khalh ngil turin an rilru an sên a ṭul a; ṭang sauh sauh zel se.
Sorkar pawh a inhawn ve a ngai. Chanchinbumite emaw, mi dangte leh eptu political party mite'n emaw sorkar an sawiselnate hi dawngsawng thiam turin rilru zau an put a ṭha. Sawiselna tam tak chu ména thlâk chi a ni ang a, ṭhenkhatte erawh chu thil ṭha zawk a thlenna tura ngaihtuah zui ngai leh bawhzui ngei chite a ni ang. Chu'ngte chu thliar thiam a ngai àwm e.
Chanchinbumite hian editorial an ziak ṭhin a, chutah chuan sorkar kal dan leh hmalakna chungchangah te, thil dangahte pawh an ngaihdan, an ngaimawhte leh ngaih pawimawhte an puang chhuak ṭhin. Chu'ngte chu mi náwlpui bakah, a bik takin ram hruaitute'n an lo chîk a, a ṭul anga an bawhzui a ṭha.
Ram hruaitute zingah chanchinbu chhiar mumal lo emaw, editorial phei chu chhiar ngai meuh lo an awm em hriat a ni lo a; chhiar ngai lo an awm a nih chuan an inenfiah hle a ngai ang. Mizo ṭhalaite lehkha chhiar tam tur leh lehkhabu leh chanchinbu chhiar ṭhin turtea kan infuih mek lai hian, ram hruaitute phei chuan chanchinbu an chhiar ngei ṭhin tur a ni a, editorial phei chu an hmaih loh a ṭha hle.