Chhiat hmaa vil ni ṭhin se

Power & Electricity superin­tending engineer chuan thu­chhuah siamin, tun hnaia ruahsur leh thli tleh vangin electric hrui thlunna ban lian pali a tlu. Electric ban tlûk chhan hi thli leh ruah vang a nih bakah, a part (tower member) eng emaw zat a bo ṭhen vang a nih thu an sawi.

Tun hnaiah Sih­hmui bula lei a chhiat hnuah sorkar lam chuan a kilhna an ruk bo ṭhen vang a nih thu an sawi tawh bawk a, an thusawi hi a dik lo tih rual a ni lo. Tunah electric ban lian a tlu leh a, a tluk chhan pakhat chu a part ṭhenkhat an ruk bo vang niin an sawi leh ta a, hei pawh hi thudik a ni ang.

Hetihlai hian sorkar lam hian a bungraw manto leh pawi­mawhte hi a vil ngai lo nge, a chhiat hnuah a chhiat chhan an hre chauh zel, tih hi mipui zawhna a ni ngei ang. Lei chim kha a chim hnuah a kilhna an ru bo tih an hre chauh a nih chuan a enkawltu lam thiam loh a ni thui hle a; tun hnaia thir ban tlute pawh hi a tluk hnuah a part an ru bo ṭhen tih an hre chauh a nih chuan a fel lo hle a ni.

Sorkar thil pawi­mawh zawng zawng hi vil (inspection neih) vek theih a ni hauh lo ang; nimahsela thil bo ṭhen thei leh chhe thei ang chi hi chu a khât tawka vil a, enkawl uluk deuh a ṭha hle. Chhiatna thlen hnua mipui puh lêt hlauh lo hian, a inven theih dan zawn ṭhin hi a finthlak a, chu chu sorkar tan tih theih loh a ni hauh lo ang.