SRS leh ruihhlo do

Central YMA chuan ruihhlo do turin Supply Reduction Service (SRS) an din leh dawn a, "Ruihhlo hluar lutuk a ngaih­mawh awm avang leh mi tam takin harsatna an tawh avanga hma la tura min ngen angin SRS hi din a ni leh ta. SRS hmalakna hi mitinte'n thlawp a, lo ṭawngṭai pui turin Mizo mipuite a sawm a ni," tiin thu an chhuah.

Tun hmain SRS hi din a lo ni tawh a, an thawm a nain an hnathawh pawh a lian a, Mizoram dinhmun nasa takin an thlak danglam thei. SRS din a nih hmain Mizoramah ruihhlo a hluar a, kawngpui lûnlaiah chhun ênlaiin ruihhlo an zuar ngam a, ruihhlo ti ve ngai lo kum lama naupang zawkte tan pawha ruihhlo tihchhin awlsam takin ruihhlo hmuh leh lei a awlsam.

SRS an lo lang a, ruihhlo a bo duak a, ruihhlo vanga thihna a tlem a, ruihhlo tih ching thar pawh an tlem phah hle. Hetihlai hian SRS-in ruihhlo tihrêm tuma an chêt danah sawisel kai a awm zauh zauh a, hmun ṭhenkhatah chuan a SRS member-te ngei pawhin mimala dem an hlawh hman hial. SRS hian hna ṭha leh ṭangkai tak thawk mah se, an hnathawh dan a fim tawk lo a, dan phal chin an thliar loh châng a awm a, an ṭhahnemngaih luatah mi ṭhenkhat dem an kai ta hial.

Mizoramin a ṭhat­pui tak SRS chu tihtawp a lo ni a, CYMA lamin ruihhlo a do dan pawh a lo nep ta tial tial a, chumi hrin chhuah chu ruihhlo vanga thihna a pung a, ruihhlo a zalen a, ṭhalai naupang te te ruihhlo ti thar an tam hle. Tunah CYMA-in Mizo ram leh hnam tana ṭangkai tura ngaiin SRS an din thar leh ta. Tun hmaa an tihṭhat kha chhunzawmin an tihsual tawhah inzir se, SRS ṭha zawk, hnathawk chak zawk leh ṭangkai zawk a nih ngei theihna turin ṭang rawh se.