Inremna awmze neiah chang se
Mizoram sorkar leh Sir Ratan TATA Trust hnuaia North East Initiative Development Agency (NEIDA) chuan tun hnai khan miretheite chawikanna atan thawh dunna thuthlung an ziak. He inremna ang hian TATA Trust hian kum nga chhunga miretheite chawikanna turin cheng vbc. 18.8 a tum dawn a, chumi hmang chuan chhungkaw 17,000 ṭanpui an ni ang a; NLUP Implementing Board kaltlanga thawh tur a ni ang.
Mizoram sorkar hian tun hmain thawhhona tura inremna ṭha tak tak a lo nei tawh ṭhin a, tun ṭuma Sir Ratan TATA Trust hnuaia NEIDA nena an inremna hi a lian ber pawl a nih hmel. He inremna hi a tak changin ṭha taka kalpui theih ni ta se, Mizoram tana thil ṭha leh hlawk tak a nih ngei a rinawm.
Hetihlai hian sorkar tel vena inremna ang chi hi a tak a chan hmaa kut lo ben mai hi kan beng thlawn zui palh ang tih a hlauhawm a, tun hma pawhin sorkar hian inrempui lian deuh deuh a lo nei tawh ṭhin a, a hlawhtlinna hmuh tur a tam lo. Inremna a nih tawh hi chuan pawl pahnihin an thawh dun a ngai a, hetiangah tak hian a sorkar lam emaw, a inrempui lam emaw an inremna thua an din loh hian a zuzi leh mai ṭhin a, hei hi tun ṭuma inremnaah hi chuan thleng tawh lo se a ṭha hle.
Mipuiin an inremna thuthlung hi a chin chhuakin hre lo mah se, rethei chawikanna tura kum nga chhunga cheng vaibelchhe 18.8 zet mai a awm tur hi thlakhlelhtham a ni. Hei hian Mizoramah rah ṭha chhuah se, a thua lian hi a takah pawh lian tel se, ram hmasawnna thlen thei tur a nih ngei i beisei phawt ang.