Mipui thinlung hneh hmasak a ngai

Home Minister hoa sorkar hotute leh tlawmngai pawl hrang hrangte leh, sumdawng pawlte September 9, 2024-a ṭhukhawm chuan kumin hunpui - Krismas leh kum hlui thlah vuakvetah hâlpuah leh hâlmawi khap leh an rêl.

Hmalakna tur an ruahman zingah - hâlpuah leh hâlmawi lam chi reng reng khauh zawka khap te, hâl lo tura mipui zirtirna zau zawka kalpui te, khua/veng tinah tlangau hmanga ngenna siam te, kohhrante ṭawiawmna ngen te, media platform hrang hrangte hman ṭangkai te, hâlpuah lak luh ṭhin tihtawp a nih theihna tura khauh lehzuala hmalakte a tel.

Hâlpuah ṭhat loh dan chi hrang hrang tun hma aṭangin inzirtir a lo ni tawh ṭhin a; chu'ngte chu kum sawm chuang hret kal taah khan a hlawhtlinna a lang a, Aizawlah phei chuan kum hlui thlahna leh kum thar lawmna atana halpuah hâl a awm loh kumte pawh a lo awm tawh.

Mahse, sorkarin hma a lak chhoh zel dan leh a bawhzui zel danin a zir lo nia ngaih theihin hâl zui a ni leh ta a; sorkarin a khap chung pawhin nasa taka hâl a ni chho leh ta a ni.

Hâlpuah leh a kaihhnawihte hi khap a nih rau rau chuan ruahmanna felfai tak neih a ngaiin a rinawm a; kuminah pawh khap a nih tur thu sorkarin a tichiang hma leh hmalak dan tur a duang chho ṭan hi a lawmawm.

Kum hmasa lamtea tawnhriat aṭangin hâlpuah leh hâlmawite hi khap ringawtin awmzia a nei tak tak lo a ni tih kan hre tawh. Mipui tam tak khap beh hi thil harsa a ni a, a pawimawh zawk chu hâlpuah hâl lo tura mipui thinlung hneh a ni. Hâlpuah hâl hi mi tam takin ṭha ti lo mah se, mi nâwlpui hi chuan hmuhnawm an ti tlat a, miin an hâl hi pawi an ti lem lo niin a lang. Hei tak hi mipui thinlung, rilru sûkthlêk siam rem ngai lai chu a ni.

Kuminah pawh khapna khauh taka kalpui chungin, hâlpuah leh a kaihhnawih thilte ṭhat lohzia te, boruak a tihchhiat nasat dan te, mite tana harsatna thlentu a nih dante nasa lehzuala mipui zirtir ni se. Home Minister hoa ṭhukhawmin an rêl angin, mipui zirtirna atan hmanraw remchang apiang hman thiam ni se; khawtlang, VC/LC, kohhran leh NGO-te chaknate pawh hman thiam ni se a ṭha hle ang.