Pawisa hman thiam a pawimawh

Finance minister chuan, sorkar kum kal mek 2015-16 chhunga budget kalhmang ruahman dan tur chiang kuang tak sorkar lai­puiin Mizoram sorkar a la hriattir loh thu a sawi a; Mizoram budget 2015-16 chu ṭha thawkhat tura an beisei thu a sawi bawk.

Sorkar laipui lamah sorkarna a inthlak a, kalphung ṭhenkhat tihdanglam a nih avangin state hrang hrangin budget an la nei mumal lo a, Mizoram sorkar pawhin sorkar kum thara budget tur a la nei thei lo. Heti chung hian sorkar lam chuan thiam taka kal a, hnathawktu lamin hlawh an lak theih dan tur an ngaihtuah a, a lawmawm hle.

Sorkar enkawltu tana thil harsa ber pakhat chu pawisa hman thiam hi niin an sawi ṭhin a, tuna Mizoram sorkar harsat chhan pawh hi pawisa tlem vang lam aiin a awm sa hman thiam loh vang a ni thui hle ang. Kan state-in thawh chhuah kan nei meuh si lo a, sorkar laipuiin thawh ve tura min beiseite kan thawh ve thei ngai si lo a, sum lo kal tur ṭhenkhat pawh a lo thlen theih loh phah a; sorkar laipuia innghat kan nih vangin kan buai hle a ni.

Mizoram sorkarin a thupui ber pakhat chu inrenchem a ni a, sum thawh chhuahna remchang dapin chhiah a tipung thar nasa bawk. Thil pawimawh tak erawh chu pawisa kan hmuh ang ang thiam taka hman hi a ni a, he mi kawngah hi chuan sorkar hian tih tur a la ngah hle mai. Thuneitu sang lamin inrenchem an duh thu an aupui nasa a; nimahsela sorkar pisa inrelbawlna an kalpui dan leh an chet vel danah a taka inrenna hmuh tur a tam lo a; inren tura an beisei sorkar hnathawkte'n an kalphung an thlak mang bawk si lo a, kan pawisa neih sa kan la inhmansiak a ang khawp mai.

Financial management hi thil awlai a ni lo a, Mizoram sorkar­na chang tawhte hi an la hming­chhe deuh zel. Mipuiin sorkar hi a sum hman danah an teh dawn a, inthlanna lo awm turah an ngaihdan vote hmangin an puang leh ang. Sorkar sum kan hman dan, kan peipun dan leh kan enkawl dan hi chuan siamṭhat leh thlak danglam a mamawh hle.