Survey firm lakah beisei a sang dawn

Land Revenue & Settlement department-in ram teh leh a kaihhnawih ṭul dangte thawk tura a rawih survey firm-te chu September 6, 2024 khan Aijal Club-ah tlangzarh a ni. LRS Minister sawi danin, department-in survey firm a rawih turte chu firm 13 an ni a; inremna siamin, ram teh leh ṭul dangte an thawk ṭhin ang.

Mizoram pumah ram teh duh leh ram chinfel duh mi tam tak an awm a, LRS department-a thawkte ringawt chuan an thawk sêng lo a, ram teh tur inhnawh khawm sing têl a awma sawi a ni. Revenue surveyor ko kal turin sum tawktarh a ngaih thute sawi a ni hial ṭhin.

LRS department-a tih tur tam lutuk chak zawka thawh leh chinfel a nih theihna tura páwn lam mi (survey firm) rawih a ni dawn ta hi a lawmawm a, sorkar hmalakna ṭha takah a ngaih theih. Ram teh leh a kaihhnawih thil hrang hrangah nasa takin department a chhâwk zângkhai bakah, mi tak tak harsatna chak zawka chinfel a nih a beiseiawm.

Survey firm-te'n Mizoram ṭhatna leh hmasawn duhna tak tak nen rinawm taka an thawh mipuiin an beisei dawn. Ram teh tur nei zingah hmanhmawh luat vanga sum lo tawktarhte pawh an awm thei, chu'ngah chuan inham buai loin, ruahmanna leh hna kal tluang pangngai an tihbuaitir loh a ngai.

Firm-te hian sumdawng rilru pu lian lutuk lo thei se, sum leh paia hlâwk lutuk duhna lakah invêng se. Survey firm zingah inelna ṭha awm thei se, thawk chak ber, thawk ṭha ber nih tumin ṭan la ṭheuh se a ṭha hle ang. An lakah sorkar leh mipuiin beiseina sang tak an nei dawn a ni.

Survey firm-te zingah thawk chak bik leh thawk chak lo bik awm theih a ni a; thawk muang fâl an awm loh nan leh dik taka an thawh vek theih nan department official lamin an kaihhruai ṭhat a, uluk taka an vil zui pawh a ṭul awm e.

Hetih rual hian, LRS department-a thawkte pawhin tha thlah loin theihtawp chhuah zel se. Survey firm-te hi sorkara surveyor pangngaite'n indah âwl nan leh inthlahdah phah nan an hmang tur a ni lo.