Police nih dan tur

President Pranab Mukherjee chuan zan khat riakin Aizawl a tlawh a, Mizoram University Convocation a hmanpui. Presi­dent lo zinah hian venhimna uluk taka kalpui a ni a, Mizorama VVIP lo zin tawh venhimnaah chuan a hautak leh inbuatsaih ṭhat ber ṭum a ni hial ang.

President lo zina venhimna a khauh avangin mi ṭhenkhat chu an phun a, 'An ti lutuk deuh a ni,' tiin sawiselna pawh a awm a; nimahsela hei hi dan anga thil tih tur an tih vang zawk a ni. Mizoram hi a ralmuan avang leh Police hotu lamin a boruak an thlir thiam avangin venhimna khauh thei ang ber chi kenkawh kher a ṭul an ti lo ṭhin a; tunah chuan police hotu lu-ah hnam dang an awm vangte pawh a ni mai thei e, President lo zin venhimna hi a khauh hle a ni.

Engpawhnise tun hi Mizoram Police-te hian inzirna atan hmang hlauh zawk se, ninawm tur leh uchuak taka thil kalpui ni loin dan anga thil kalpui a nih zawkzia hi hre thar se a ṭha hle. Dan ang lo deuh leh a hahdam zawngin kan lo kal ṭhang tawh a, discipline lekkawh tur bera ngaih police chhungah pawh discipline a chhe sawt hle niin an sawi. President lo zin dawngsawng tura an inbuatsaihna ang hi police awm dan tur a ni tih hriat thar lehna atan hmang thei se a ṭha khawp mai.

Police chu hun vawng dik, smart, taksa hrisel ṭha leh inzo (fit) ṭha, mipuite tan pawha thlamuanpui tham tura ngaih an ni. Mi­zoram police zing­ah mi ṭha, fel leh hmantlak ṭha­hnem tak awm mah se, police inthlahdah leh fel lo leh chhawr­tlak mang lo thlenga an tam tawh avangin insiamṭhatna remchangah hmang se President lo zin hi Mizoramin rin loh lamah a hlawkpui dawn hle a ni.