Khawtlangin hnathawh vil ṭhin se

Serchhip Sub Hqrs YMA Vigilance & Monitoring Com­mittee chuan tun hnai khan Serchhipa hmasawnna hnathawh mek ṭhenkhat an enfiah a, National Highway 54 chei ṭhat hna thawh mek pawh an enfiah. 

Serchhip YMA hian tun hma pawh­in an huam chhunga hmasawnna hnathawhte a ṭhat tawk leh ṭhat tawk loh an lo endik tawh ṭhin a, an fakawmin an entawntlak hle a ni. Mizoramah hian state dangte aiin hnathawhna tur sum a tlem hret a nih pawhin a sum lo lut chhunte hi a nihna tur dik takin hmang ngat se heti lutuka dinhmun chhe tur hi kan ni bîk lo a; nimahsela kan politician-te leh sorkar hnathawk ṭhenkhatte thlenga contract leh supply hna thawh an tum ve zel te, contract hna kan hralh chhawng nasa lutukte hian hmasawnna ruhrel din kawngah min tihnufum rei ta hle. 

Sorkar kalphungah chuan hnathawktu an awm a, hna viltu an awm leh bawk. Mizorama hnathawh tam takah hi chuan a thawktu leh a viltu lam hi inremsiamin thiam takin thil an kalpui a ang ber a, a viltu leh endiktu turte ber pawhin a dik lo leh fel lo an hmù lo der a, a tling lo leh tlak lote pawh an pawmzam zel a, tun hi kan thleng ta a ni. Serchhip khaw­tlang ang hian sorkar hna kal laite hi taima takin vil thei ila, hna ṭha lote pawh sawisel ngamin dan lo anga hnathawk pawh khak ngam se, Mizoram hian hma a sawn ngei ang. YMA branch, group leh Sub headquarters dangte pawhin sorkar hna kal lai hi vil ṭhin se, ram hmasawnna turin a ṭangkai dâwn hle a ni.