Zirlai ni chunga mahni intodelh

Students’ Self-Support Union chuan September 10, 2024 zan khan zirlai mahni intodelh pathum hnenah chawimawina Self-Support Award an hlan. Hetiang award hi kum eng emaw ti kal ta aṭang khan kum tin an hlan ṭhin.

Zirlai, mahni mamawh leina tur thawk chhuak a, mahni intodelhte chawi sang zawnga SSU hmalakna hi a ṭha hle mai a; chawimawi tur zirlai an awm zel pawh a lawmawm. Hetianga chawimawina inhlan ṭhin hi zirlai tam tak tiharhtu, mahni intodelh tura tiphûrtu leh, intodelh mekte pawh phûr tharna petu a nih ngei a rinawm.

Mizo zirlai zinga tam tak chu an mamawh apiang nu leh pa leh chhungte'n an tumsak theih an ni a; chutih laiin, chhungkaw khawsak tak aṭanga chawr chhuak, zirna chhunzawm tur pawha nasa taka beih ngai tam tak an awm bawk.

Mizo ṭhalai, lehkha zir mek leh zir zo tawh zingah mi hnuaia hna hrám thawka inhlawh zak an awm ṭhin; thatchhiat vang leh rilru piansual vang a ni tlangpui. Thawh tur awm ang ang zak hauh lo leh taima taka thawk ṭhin mi tam tak an awm bawk a; chutiang mi chu zirlai - sikul kal lai leh university-a zir mek zingah eng emaw zat an awm mek.

Zirlai nih lai aṭangin sum hlutna hriat chian a ṭha a, sum thawh chhuah harsatzia leh hautakzia hriat a ṭha. Lehkha zir tura inhlawhfâk ngaite zak hauh loin inhlawh zel se, harsat karah beidawng loin bei ṭâng ṭâng zel se.

Sum leh paia harsatna nei lo zirlaite pawhin chhungte thawh chhuahsa ringawt ring lo a; mahni intodelh tumna rilru neiha intodelh tura inhlawh nachángte hria ila; tawrhchhel zirna leh puitlin inzirna ṭha tak a ni ang.

Zirlai inhlawh ṭhinte hi dah hniam mai lo ila; zirlai mahni intodelhte hi ngaihsan zawk nacháng kan hriat a ṭul hle mai. Chhungkaw dinhmun azir zelin mahni dinhmun ṭheuh hriatthiam te, rilru leh ngaihtuahna dik neihte a ṭul a; chutiang tur chuan nu leh pa leh zirtirtute pawhin an kaihhruai a ngai àwm e.