President-in ṭhalaite a sawmna kha

Mizoram University (MZU) Convocation hmanpuitu President Pranab Mukherjee chuan, India ram hmun dangah ṭhalaite tana remchanna a inhawng zel angin, Mizoram ṭhalaite tan pawh hun ṭha leh remchang a inhawng zau zel a, hei hi Mizoram ṭha­laite'n hmang ṭangkaiin, hmun danga ṭhalaite nen inlungruala ram hmasawnna tura thawhho a pawimawh a ni," a ti.

President-in Mizo ṭhalaite a fuihna, India ram ṭhalai dangte el phak tura a chah hi thil ngaihtuah zui ngai tak a ni. Mizo ṭhalai zingah mifel leh thiam tak tak ṭhahnem tak an awm tawh a, an kalna kawnga India rama zahpuiawm lo tak takte an ni hlawm tawh a; nimahsela Mizo ṭhalai nawlpui hi chuan India ram hmun dang ṭhalaite hi zirna leh thiamna kawngah hian an rual kan la pawl pha tawk lo niin a lang.

Ramin hma a sawn a, chu chuan zirna lam thlengin nghawng a nei chho zel. Mizorama zirna inte pawhin zawi zawiin hma a sawn ve zel a; nimahsela state pawn aṭanga pan tham khawp zirna in hi kan la nei lo a ni ber a, MZU-te pawh a rualpui university-ah chuan a ṭha ber pawl ni bawk mah se India ram hmun dang aṭanga pan luai luai tur chi chu a la ni lo. Zirna in ṭha kan neih loh chuan zirna in ṭha zawka kalte hi el phak an harsa ṭhin a; zirna mawngphah aṭanga a lêr lam thlenga zirna in ṭha kan neih theihna turin a mawhphurtu lamin ṭan la thar se, rual elna rilru nen zirna in enkawl se a khawp mai.

Ṭhalaite'n state dangte an el dawn chuan a inbuatsaih nan, an inzirna lamin hma a sawn hmasak a ngai. Ṭhalai thiam thei fâl leh fel deuh bikte chu an awm ngei a, zirna in ṭha vak lo aṭanga India rama hna sang chelh theia inzir chhuakte leh, thiamna sang ber ber nei thleng phak an awm. Nimahsela mi bik ni ve lote tan India ram inelna tukverha dâk chhuak ve turin remchang (opportunity) a vang a, a zirna lam hi kan neih ṭhat hmasak chuan zirlai ṭha hi chu an awm chho zel ang tih a rinawm.

Kan zirna inte chu eng ang dinhmun pawh chu lo ni tehreng se, a pawimawh chu a zirlaia a ni. Zirlaite hian India rama ṭhalai dangte elna rilru an neih loh chuan Mizoramah hian kan inawm tlei tawk vel ang a, hmun dang ngai lo inti tak siin midangte phak lo hian kan awm reng ang tih a hlauhawm hle. Kan ṭhalaite'n zirna kawngah hnam dangte el ngam se, anni tluka inzir turin theihtawp chhuah se, thuneitu lamin zirna ṭha leh changtlung zawk pek tumin ṭan la ve bawk se, hei hi ram leh hnam humhalhna kawng pawh a ni nghal a, hmasawnna kawng dik leh ṭha tak chu a ni e.