State sorkar leh kawngpui chhia

Mizorama kawngpuite chu sorkarin siam duh mah se, ruahtui a tlâk reng avangin siam theih a la ni lo a, ruahtui a tlak loh hunah siam a nih tur thu leh kawng siamna tur sum a awm thu PWD Minister-in a sawi.

Kumin 2024-ah hian ruahtui a tam hle mai a, mi tam tak chuan kum eng emaw zat chhunga ruahtui tlâk tam ber kum a ni tawhah an ngai. Thil awm dan tlangpuiah chuan, fûr lai hi kawng chhiat duh hun a ni a, Mizorama kan kawngpuite pawh ruahsur loh hun lai ai chuan a chhe zawk ngei ngei ṭhin.

Kumin phei chu ruahtui a tam em em a, kum danga fûr lai aiin kuminah a chhe zawk deuh a nih pawhin mi pangngai tan chuan a hriatthiamawm. Chutih rualin, kawng chhe lutuk, lirthei tlan hleih theih loh hial khawpa a awm erawh a dik bik lo.

Khawpui chhung kawngpuite hi chhe viau mah se, tlân theih loh khawpa chhia a awm lo a; a manganthlak zawk chu Mizoram mamawh tinréng lâk luhna national highway kawngpui chhe lutuk hi a ni. Hun eng emaw ti kal ta aṭang khan lirthei tana tlân hleih theih loh khawpin a chhe tawh a, Mizoram mipui ni tin mamawh tinréng rawn phur luttu driver-te an khawngaihthlak tak zet.

NH kawngpuite hi state sorkar enkawl ni lo tlangpui mah se, heti a taka a chhe lutuk hi chu state sorkar hian a ngaihthah deuh em ni chu aw, tia ngaihtuah theih a ni. State sorkarin ngaihven tak takin, a chhe zual laite thawm ṭha turin NH enkawltute na takin nawr char char se chuan heti lutuk lo deuh hian a awm theih mi tam takin an ringin an beisei a ni.

Mizoram mipuiin state sorkarah beiseina sang tak an nei a, chu beiseina chu sorkarin a tihpuitlin a ṭul. NH kawngpuite hi state sorkar enkawl ni lo mah se, lirthei tlân theih loh khawpa a chhia hi chu sorkar mualphona a ni tel ve tih hria se, ruahtui a la hul lo a nih pawhin lirthei tlân tlang theih tur tala thawm ṭhat a nih theih nan state sorkarin chak taka a bawhzui a ngai e.