Zirtirtu mahni hna thawk lo
Lai Students' Association (LSA) general headquarters, Lawngtlai chuan thuchhuah siamin, zirtirtu mahni awmna tura awm lote chungchangah chak zawka hmalak an tum thu an puang. Zirtirtu ṭhenkhat chuan sikulah zirtir hna thawk loin, office lamah dah (attached) an ni tih an sawi a, "Hei hi RTE kalh a ni a. RTE Act-ah chuan election emaw, census emaw avang chauhin zirtirtute hi pawhpên theih an nih laiin, election leh census vang ni loa pawhpên an ni hi hriatthiam har kan ti," an ti.
Mizoramah hian sorkar sikula zirtirtu ni si, an awmna tur hmuna awm loa hmun danga awm ta daih hi tam ham tak an awm. Ṭhenkhat chu an hlawh lakna tur sikulah thawk duh loin hmun nuam zawkah an awm tlat a, ṭhenkhatte chu thiam takin office-a thawk turin pawh pên (attached) an ni bawk a, hetiang hian kum tam tak chu zirtirtute hi an lo awm tawh.
Zirtirtu hi chu sorkar hnathawk dang ang an ni lo a, mipui nen an inhne hnai em em a, khaw tin deuhthawah an awm bawk avangin zirtirtute chanchin hian sawi a hlawh ṭhin. Sorkar hnathawk dangte pawh inthlahdah tak tak chu an awm ngei a; nimahsela an hna leh mipuite direct taka a inzawm nghal loh avangin mipuiin an ngaimawh lo pawh a ni thei a, zirtirtute erawh an fate zirtir tura an duh miau avangin an awm dan pawh mipuiin an chik bik hle.
Zirtirtu tura lak, chumi hmanga hlawh pawh la ṭhin mi ṭhenkhat office lama dah an ni ṭhin hi chu thil fel lo tak a ni. Mi thiam bik, office lama ṭangkai tur bik mi tlem azawng an lo pawt a nih chuan a la hriatthiam theih a; amaherawhchu thiamna bik pawh nei lo, an awmna khua a hlat em avanga khawpui zawka nuamsa deuha office-a ṭhu tura dah an la awm fo hi sorkar hian a tihtawp a ngai a ni.
Zirtirtu hna chu zirtir a ni a, sikulah a thawk ngei tur a ni. Mahni awmna khuaa awm duh lote leh mahni hnathawh lohna tur hmuna thawkte hi sorkar hian a titawp ngam lo a nih loh chuan tihtawp theih loh thu a awm lo. Mizorama nu leh pa tam tak leh zirlai tana harsatna thlentu, mahni hmuna awm duh lo zirtirtute hi sorkar hian a en liam mai dawn em ni?