Chhungkua a pawimawh

YMA hnuaia Supply Reduction Service (SRS) member-te chu a vawi khatna atan Aizawl khawpui hmun pathumah ruihhlo leh a khawihtute vaiin an hnatlang a; ruihhlo khawih mi 53 an khawm a, heng zinga mi ṭhenkhat hi chu hawna tur chhungkua nei mumal tawh lo leh mahni chhungkua aṭanga tlanbo tawhte an ni.

Mizoramah ruihhlo vangin chhungkaw tam tak a kehchhe mek a, chumi lan chianna chu nau hnuchham enkawlna leh ruihhlo ngai en­kawlna hmun kan neihah hian a chiang a; SRS-in vawi khat an thawh chhuahnaa khawlaia vak rawlai mi 53 zet an man aṭang hian chhung­kaw buai leh harsatna tawk an tamzia a lang chiang hle a ni.

Mizote'n kan hmuh hmaih lian tak nia lang chu chhung­kaw inenkawlna hi a ni. Kohhran lamin 'Kristian Chhungkua' an vei a, campaign-te neiin chak takin an kalpui a, a ṭha e; nimahsela Kristian pawh ni ve lem lo, India rama hnam dangte hi chhungkaw inrelbawl danah chuan Mizote hian kan tluk lo hle niin a lang. Vai kan tih tam takte hi sakhuana lamah chuan Mizote nen rinna inpersan daih an ni tlangpui a; nimahsela anni zawk hian chhungkua an enkawl thiam a, chhungkua an dah lal a, an fate an thunun ṭha a, ruihhloa buaina leh hmeichhiat mipat lama tlan nasat avanga in leh lo chhuahsan ta pawh an tlem deuh zawk niin a lang.

Pa berin chhungkua aia ngaih pawimawh a ngah tawh chuan a fel lo a, khawtlang leh thil danga kan inhman hi ṭha hle mah se mahni chhungkua chinfel hmasak ṭheuh a pawimawh. Nu lam pawh an bang lo a, nu ni si in chhuahsan tam lutukte hi a ṭha ber lo a, a Kristian lo zawkte aia chhung­kaw enkawla kan hlawhchham zawk nia langte hi nuhoin chonaah ngai se, insiamṭhat an ṭulna laite inhmu ngam se a ṭha khawp mai.

Tun ang zela kan kal chuan mipui nuai 10 bawr vel ni si hi chhungkaw mumal nei lo kan pung zel ang a, chhungte'n an hnawhchhuah leh mahni chhungkua aṭanga tlanbo kan neih belh zel ang a, Mizoramah mi beidawng an pung zel ang. Kan dinhmun hi ṭha tawh lo hle mah se, insiamṭhatna khua a la tlai lo a, mahni chhungkua ṭheuh i chingfel hmasa ang u.