Escort vehicle thar lei leh sawiselna

Mizoram sorkara Home/Police department-in escort vehicle tur tun hnaiah Mahindra Thar thar pathum a lei a, hemi chungchangah hian politics thila inbeihna a awm zui a ni.

Party pakhat ṭhalaite'n Mahindra Thar pathum leina atan cheng nuai 51 hman a ni chu, 'mipui zahlohna leh palzûtna dik tak a ni,' an ti a. Police department chuan CM hman tura lei a ni lo a, Police-in Chief Minister security-a duty police-te hman tura an lei a nih thu leh lei a nih chhante an tarlang.

Eptu party-te'n an sawisel chhan hi Chief Minister tih hming a rîk vang leh CM hman tur tia sawi a nih vang a ni thei a; CM emaw, sorkara thuneihna chelhtu politician-te emaw hming lang lo se a dang deuh mai thei.

Mizoram sorkarin lirthei a lo lei tawh ṭhin a, sing tél a lei tawh àwm e. Eng party pawhin sorkarna chelh se, sorkar tana lirthei lei hi chu eng emaw zat a awm vek a ni. Sorkar chu eng party kaihhruai pawh ni se, party-te hi indema insawisel chiam tur an awm bik lo mai thei. Chutih rualin, àwm ang lo lutuk leh ṭul lem loa ngaih theih erawh a awm thei a, chutiangah chuan indem leh insawisel a ṭulna chin pawh a awm.

Sorkar sorkar lirthei hmangtu chu minister te, officer te, mi pawimawh dang te, department, corporation leh commission te, sorkara pawimawhna dang neite an ni. Sorkarin lirthei a lei a ṭul a, a la lei zel dawn a; tu party pawh sorkar se, an la lei zel dawn.

India ram inrêlbàwlnaah political party-te hi an pawimawh em em a, sorkara thuneihna chelhtu, ramin hma a sawn leh sawn loh hriltu an ni a; eptu political party-te pawh sorkar khalh ngíltu an ni ṭhin.

Thil inang rengah sorkar laia ṭul leh ṭha tih reng, sorkar loh laia ṭul lo leh ṭha lo tih tak tlat si te, ṭha leh ṭha lo tih a danglam ta tlat ṭhin ang hi chu ram tana ṭha zawk duhna tak tak vang ni loin, sorkar sawisel leh tihmualpho tumna vang a ni châwk.

Eptu party-te'n sorkar an sawisel ṭhin hi an tih tur a ni a; chutih rualin, sawiselnate chu sorkar tihmualpho tum vang ringawt ni loin, ram leh mipui tana thil ṭha zawk duh vang leh ram hmasawn zawkna tur ni zel rawh se.