Mahni hnathawhna tur hriat chian

Chennai Mizo Welfare Association (CMWA) huaitute leh Tamil Nadu police-te chuan tun hnaiah Mizo tlangval pahnih sal ang maia an chhawr chu an chhanchhuak. Heng Mizo tlangvalte hi phaia hnathawk tura kal, beisei anga an tluan loh hnua hmelhriat loh an belh hnua tal buai zui ta an ni.

Mizo ṭhalaite zingah Mizoram pawna hnathawk tura pen chhuak hreh lo eng emaw zat kan awm ta a, hei hi hmasawnna duhawm tak a ni. Mizoramah hna thawh tur a vâng a, state pawnah hlawh ṭha zawk hlawha hnathawh tur hmuh theihte a la awm ṭhin avangin state pawna chhuahte kan intihhmuh a, thil lawmawm tak a ni a; amaherawhchu state pawna chhuak turte hian kan hnathawhna tur kan hriat chian a ṭul hle.

Mizo ṭhalai state pawna hnathawk tura chhuak zingah hian bum tawk eng emaw zat an awm tawh a, hmeichhe ṭhenkhatte phei chu hmeichhia an nihna hmang ṭangkaia mawi lo taka eizawnna kawhhmuhte pawh an lo awm tawh ṭhin. Heng Mizo ṭhalai vanduaite hi an sual vang leh an duh reng vanga talbuai an ni lo a, an hriat loh vang leh an fimkhur tawk loh vanga buai an ni.

State pawna Mizo awmte'n thuchhuah siamin vawi tam tak fimkhur turin Mizoram mipuite thu an lo chah tawh ṭhin a, hengte hian umzui a hlawh lo fo. Tun hnaia harsatna lo awm thar leh ta hi Mizo ṭhalaite'n inzirna atan hmang ila, kan buaina ngaia buai nawn tawh lo turin mahni hnathawh tur ṭheuh i zir chiang hmasa ṭhin ang u.