Kawng siamah hmanhmawh a ṭul

Chief Minister chuan September 16, 2024 khan NH-6 Kawnpui leh Khàmráng inkar chhe lutuk chungchangah Mizoram Commercial Vehicle Union hruaitute a kâwm. Kawng enkawltu contractor Satguru-in contract an neih lai chu sorkarin a tihtawp thu leh, contractor-a maintenance fund la awmte leh state sum hmangin kawng chhiate chak taka thawm ṭhat a nih dawn thu CM-in a sawi.

NH-6 hi Mizoram mamawh tinrêng lâk luhna kawng a nih avangin a pawimawh zual a; kawng a chhiat viau tawh hnu, lirthei an tlân hleih theih tawh loh hnuah pawh sorkar hotute'n thâwm an nei mai lo a, PWD Minister-in a hmuna a tlawh thâwm hriat tur a awm lo.

Kawng chhe lutuk vanga Mizoram ni tin mamawh phurtu truck-te an tlân theih tâk loh hial hnu, ni tin mamawh ṭhenkhatah harsatna a thlen hnuah leh lirthei pawlte'n lungawi lohna lantir an tum thu an puan hnuah sorkar hotute'n thâwm an nei chauh mai. Mizorama NH kawngpui chhiate hi sorkarin a ngaihven har mah mah a ni.

Mizoram châk lâkna kawng pui ber lirthei kal thei loh khawpa a chhia hi a dik lo a, kâwisurut pawha hmanhmawh taka siam a ṭul tak zet. Mizoram sorkar (PWD) enkawl a nih loh thu hmanga thiam inchantirna chi a ni tawh lo a, sorkar hmasa dema insawi fihlîm tumna chi pawh a ni tawh lo.

Hmun danga kawngpui chhe lutuk, lirthei tlân hleih theih loha awm mek dangte pawh sorkar hotute'n an ngaihven thuai a ṭul; mipui an khawngaihthlak lutuk tawh. PWD Minister leh department hotu lute'n a rang lamin a hmunah tlawhin, kawng siamtu contractor/company-te fuihin nawr se awmzia a neih ngei a rinawm a; kawng chhiain a nghawng mipui tan pawh a ngaihṭhatthlak deuh ang.

Mizorama kawngpui chhe lutuk hi sorkar hian mawhah lain, a theihna apiangah chak takin bawhzui se, kawng siam dan tur pangngaia siam theih a la nih loh pawhin lirthei tlân theih tur tala an thawm ṭhat vat vat a ṭul a ni e.