Health care scheme thar

Health Minister chuan tun hnai maia chanchinbu mi hnenah Mizoram sorkarin health care scheme thar a kalpui tur Mizoram Universal Health Care Scheme (MUHCS) atan Asian Development Bank loan ngaihchân mek a nih thu leh kumin October thlaah inziah luh thar ṭan theih an beisei thu a sawi.

Kum 2023-24 atana Mizorama Health Care Scheme-a inziak lut mekte hun chu March 31, 2024 khan a tàwp tawh a; scheme thar - Rs 5,00,000 thleng hman tur awmna MUHCS peih a la nih loh avangin June 2024 thleng pawh sei a ni. Peih a la nih loh zel avangin July 2024 thleng leh September 30, 2024 thleng atan pawhsei leh a ni bawk. Vawi thum pawh sei a ni tawh tihna a ni.

Kum 2023-24 atana health care scheme kalpui chu September 31, 2024 thleng atan pawh sei a nih rual hian, policy-in a pek theih zat hmang zo tawh tan hman theih a ni tawh lo. Thla 12 (kum 1) chhung atan Rs 2,00,000 hman theih a ni a, tunah thla 18 a ral ṭêp tawh a, policy-a inziak mi tam tak chuan sum hman tur an nei tawh loin a rinawm a, health care scheme nei lo ang an ni tawh.

Health Minister-in a sawi angin, MUHCS thar atan hian ADB aṭangin sum beisei a ni. ADB-in a pek hun tur hriat a ni lo a, health care scheme hlui pawh sei mek chhungin sum a pe ngei dawn em tih hriat a ni lo. ADB hian sum pe mai lo ta se, tun thlaah emaw, thla tharah emaw, kumin chhung pawhin pe hman lo ta se, eng tin nge sorkar hian a tih dawn?

Health care policy kal mek leh pawh sei mekah hian inziak lut mi tam takin an hman tur ang an hman zawh tawh avangin hmuh tur an nei tawh lo a, chutih laiin, policy thar hman ṭan a la ni si lo. Inenkawl reng ngai mi tam takin harsatna an tâwk mek tawh a ni.

ADB hian sum a pe mai lo a nih pawhin, Mizoram sorkar hian MUHCS a kalpui tak tak dawn chuan kawng (source) dang aṭangin bul ṭan phawt dan a ngaihtuah a ṭul ta niin a lang. ADB aṭangin sum hmuh ngei a nih dawn chuan ADB sum hmuh hma pawhin sum remchang dang hmangin bul lo ṭan phawt se, ADB sum hmuh hunah rulh leh mai ni se a ṭha lo'ng maw?

Mipui dinhmun thlirin, health care scheme thar MUHCS hi kalpui ṭan a hun viau tawh a ni.