Mipui an harh, sorkar a harh em?

Tun hnaiah Mizoram hmun hrang hrangah sorkar laka lungawi lohna thawm hriat tur a awm ṭhin a, hei bakah hian mipuiin an ngaihdante puangchhuakin anmahni ngei an pen chhuak ngam. Nuar, pisa kai tur dang, kawngpui dang leh lungawi lohna lantirna thil hrang hrang kan hmu ṭhin.

Tun hma deuh kha chuan sorkar lakah mipui thikthu a chhe tawk lo a, mipuiin sorkar thiltih dik loh an hmuh pawhin an phun an phun a, an en liam mai ṭhin. Tunah erawh chuan mipui lam an harh tawh a, an chanvo an chan lohin au chhuah nachang an hria a, an au chhuak ngam tawh a, sorkar pawh an nawr na sawt hle a ni.

Mizote hi a nawlpuiin thil dik lo kan hmuh reng pawh ngawih bopui mai ṭhin kan ni a, hei vang hian mi dik lote an dingchang a, sorkar ngei pawh hian mipui ngawichawi lutuk hi remchangah an hmang mai ṭhin niin a lang. Mipui hian kan chanvo kan hriat chian tawlh tawlh avangin tunah chuan kan harh ṭan tawh a, RTI Act hmangin thil engkim a zawhfiah theih a, thiamna leh hriatna a pung zel a, sorkar laka kan thikthu pawh a chhe sawt ta hle. Hei hian rah ṭha tak a chhuah zel dawn niin a lang.

Hetihlai hian sor­kar ber hi a harh chhuah a ngai a, an thiltih leh an chet­velna hi mipuiin an hmu reng tih hre chiangin dik leh ṭha zawkin ram kaihruai ṭhin rawh se. Mipui­ah an tih theih loh tur intiam lo se, an tih tura tla chu ṭha takin thawk mai ṭhin rawh se. Sorkarin mipui zah lo leh hlau lo taka thil a kalpui chuan ramin a tuar a, mipuiin an tuar a; mipui thinrimin vote hmanga an ngaihdan an puanchhuah hma pawhin an thiam dan leh theih danin lungawi lohna an lantir zel ang a, chu chu sorkar tan chuan tawrhhlelhawm tak a ni zel ang.