Thlawhtheihna leh Mizoram

Development of North Eastern Region (DoNER) minister Dr. Jitendra Singh chuan, Lengpui Airport leh Delhi inkarah thlawhtheihna service a awm theihna atan theihtawp a chhuah tih sawiin, Lengpui-Delhi direct flight a awm theih ngei a beisei.

Mizoramin airport a neih dawn khan sawiselna a tam hle mai a, ṭhenkhatin politics zawngin thil an la kawi a, mi ṭhenkhatin mi hausate chauhin an hman tur ang maiin an sawi. A takah thlawhtheihna ṭum hmun kan nei ta a, a ṭangkaizia hretu chu Mizo mi­puite kan ni a, a chhawrtute pawh mi hausa chauh ni loin mipui nawlpui pawhin an chhawr hle. Tun hnaiah rel kawng sial sawi rik a ni a, sawi rik a nih ṭan aṭangin sawiseltu an awm a, rel lo lut hi inchimralna tur a nih thu lo sawi tawk an awm bawk a; an sawi ang hi chu a ni vek kher awm lo e.

Thlawhtheihna service hi a tir lamah chuan a tam tawk lo a, tunah hi chuan Lengpui leh Kolkata inkar bakah Lengpui leh Guwahati inkarah nitin thlawhtheihna vawi hnih thlawk ziah ang a ni ta. Hunpui leh sikul/college chawlh vanglai chuan a chuang tur an tam vanga ticket chan loh châng a awm a, thawl taka a thlawh chang pawh a awm bawk.

Hmun hla zawka zin chhuak tur tan Aizawl leh Kolkata inkar lirthei leh rel-a kal man, kalkawnga ei leh in mana senso leh riahna mante nen phei chuan thlawhtheihnaa kal mai hi a hlawk zawk chang a awm a, hei vang hian thlawhtheihna hi kan hmang nasa ta hle. Tunah DoNER minister-in India khawpui Delhi thlenga kal theihna tur neih a rawt hi thil lawmawm a ni a, hei hi hmasawnna kawng pawimawh a ni a, sum leh hun tam tak hum theihna tur a nih hmel.

Mizoram sorkar mi pawimawhte zinna tam ber hi Delhi a nih tawh hmel a, anni bakah zirlai, damlo, sumdawng leh zin khawthawng duhte pawhin Mizoram ṭangin Delhi an tlawh nasa hle. Hei vang hian Lengpui aṭanga Delhi thlawhtheihna service awm tur hian Mizote hun paih ṭhin tam tak a hum ang a, sum senna tam tak pawh a su hêk thei dawnin a lang a; Lengpui-Delhi inkara thlawhtheihna thawk tura ruahmanna awm hi tihlawhtling ngei rawh se.