Chakma

ZNP president Lalduhoma chuan, Chakmate chu India ram dan bawhchhiaa a rûka Mizorama lutte an nia sawiin, "Mizote min tibuai zel dawn a nih chuan kan ngaithiam dawn lo," a ti. Hetihlai hian MPC ṭhalai chuan thuchhuah siamin, chief minister Lal Thanhawla'n Inter State Council, New Delhi-a neiha Bangladesh-a mi firfiakte chetna chu India hmar-chhak pum tana hlauhawm thei a nih avanga ramrite uluk leh zuala venhim a ṭulzia a sawi chu lawmawm an tih thu sawiin, Chakma foreigner ven kawngah ṭan la lehzual turin an phut.

Tun hnaiah Chak-ma chungchang sawi rik a awm zauh zauh a, a chhan lian tak chu STEE Rules chungchang Mizoram Chakma Students Union (MCSU)-in Gauhati High Court-ah an khin vang a ni. Chakma an ni emaw, eng hnam pawh ni se dan anga Mizorama awmte chungah tu mahin mawi lo takin thil an ti lem lo a; nimahsela harsatna an siam a nih erawh chuan ram leilung fate thikthu a chhe ṭhin a ni.

Chakma kan tih hian chi hnih an awm a, pakhat chu dan ang thlapa Mizoram chhunga chengte an ni a, pakhat dang chu dan loa Bangladesh aṭanga rawn lut rute an ni. Heng Chakma-te hi Mizorama an lo luh ruk hnu hian dan anga awmte nen an hriat hran hleihtheih loh a, hei hi a pawi hle a ni. Dan anga awm Chakma zawkte hian hetiang mite hi anmahni tan pawha hnawksak an ni tih hi pawm se, dan loa lo lut na na na chu a thawn kir theih dan zawng zawk se a ṭha ang.

Tun hnaiah Chak-ma zirlaite'n Mizorama zirlaite tana technical en-trance pek hnua seat insem danah court-ah hial kalin Mizoram sorkar an khing a, a pawi khawp mai. Chakma zirlaite hian anmahni hmasial avanga ram leilung fate tana harsatna an siam hi a ṭha lo a, mahni chauh inngaihtuaha midangin an tawrh theihna tur thlen hi chu ching zui lo se a ṭha. Chuti ni loa mahni tan chauh zela thil kan ngaihtuah a nih chuan he rama harsatna tawk nasa tur chu hnam tlem zawk zel hi an ni dawn a, hei vang eng Mizoram chhunga cheng Chakma-te pawh hian ramin a ṭhatpui tur ngaihtuah se, state pum tarmit aṭangin thil thlir
ṭhin rawh se.